फोंडा: करंजाळ-मडकई येथे गुरुवारी संध्याकाळी अज्ञाताकडून कारगाडीवर गोळीबार झाल्यामुळे हा परिसर हादरला असून हल्लेखोरांच्या शोधात पोलिस आहेत. भारतीय जनता पक्षाचा युवा नेता तथा व्यावसायिक सौरभ सुदेश लोटलीकर यांच्यावर हा गोळीबार करण्यात आला होता, पण सुदैवाने सौरभ लोटलीकर थोडक्यात बचावले. मात्र अजून या गोळीबाराचे गूढ उलगडले नसल्याने उलटसुलट प्रतिक्रिया व्यक्त होत आहेत.

मडकई मतदारसंघातील करंजाळ येथे गुरुवारी संध्याकाळी सातच्या दरम्यान हे गोळीबाराचे प्रकरण घडले आहे. सौरभ लोटलीकर हे जी०९ डी ९७९७ या क्रमांकाच्या इनोव्हा कारगाडीने घराकडून मडकईच्या दिशेने जाताना वाटेत कारगाडी थांबवून सौरभ लोटलीकर खाली उतरल्यावर लगेच गोळी झाडण्यात आली.

मात्र सौरभ हे गाडीतून खाली उतरल्यामुळे गोळी कारच्या दरवाजाला लागल्याने थोडक्यात बचावले, पण कारगाडीच्या पुढच्या दरवाजाला छेद पडला असून काचही फुटली आहे. त्यामुळे गाडीचे दहा हजार रुपये नुकसान झाले आहे.

हा हल्ला झाल्यानंतर सावरलेल्या सौरभ लोटलीकर यांनी त्वरित म्हार्दोळ पोलिस स्थानक गाठून तक्रार नोंदवली. त्यानंतर म्हार्दोळ पोलिसांनी घटनास्थळी धाव घेऊन तपासाला वेग दिला. पोलिस उपअधीक्षक शिवराम वायंगणकर तसेच म्हार्दोळ पोलिस स्थानकाचे निरीक्षक योगेश सावंत, फोंडा पोलिस स्थानकाचे निरीक्षक विजयनाथ कवळेकर यांनी कसून तपास सुरू केला आहे, मात्र अजून धागेदोरे सापडलेले नाहीत. दक्षिण गोव्याचे पोलिस अधीक्षक टिकमसिंग वर्मा हे काल रात्री म्हार्दोळ पोलिस स्थानकात दाखल झाले आणि त्यांनी तपासाचा आढावा घेतला.

दुचाकीने आले हल्लेखोर

सौरभ लोटलीकर यांच्यावर गोळी झाडलेले हल्लेखोर हे दुचाकीने आले होते, मात्र ते दोघेजण होते, की एकटा होता यासंबंधी माहिती मिळू शकली नाही. हा हल्ला एवढ्या गतीने झाला की सौरभ लोटलीकर यांना हल्लेखोरांना ओळखणे कठीण झाले.

पूर्ववैमनस्य की व्यावसायिक कारण...?

हा हल्ला करण्यामागे अजून कारण स्पष्ट झालेले नाही. हल्लेखोरांनी गोळी झाडून पलायन केले. गोळी कुठे लागली हे त्यांनी पाहिलेले नाही.

मात्र हा हल्ला पूर्ववैमनस्यातून की व्यावसायिक कारण आहे, याचा शोध पोलिस घेत आहेत. म्हार्दोळ पोलिस याप्रकरणी कसून तपास करीत आहेत.