पणजी: कदंब वाहतूक महामंडळाने चालक व वाहक पदांसाठी मोठ्या प्रमाणावर भरती प्रक्रिया हाती घेतली असून एकूण ३०० कंत्राटी पदे भरण्यात येणार आहेत. यासाठी पात्र उमेदवारांकडून अर्ज मागविण्यात आले असून २५ व २६ जून रोजी थेट मुलाखतींचे आयोजन करण्यात आले आहे.

कदंब महामंडळाने जारी केलेल्या माहितीनुसार २०० वाहक आणि १०० अवजड वाहन चालक पदांची भरती कंत्राटी तत्त्वावर केली जाणार आहे. निवड झालेल्या उमेदवारांना दरमहा २२ हजार रुपये एकूण मानधन देण्यात येणार आहे. संबंधित पदांसाठी आवश्यक पात्रता पूर्ण करणाऱ्या उमेदवारांनी मुलाखतीसाठी आवश्यक कागदपत्रांसह उपस्थित राहावे, असे आवाहन करण्यात आले आहे.

या पदांसाठी थेट मुलाखती २५ आणि २६ जून रोजी सकाळी १० ते सायंकाळी ४ या वेळेत पर्वरी येथील कदंबच्या केंद्रीय कार्यशाळेत घेण्यात येणार आहेत. इच्छुक उमेदवारांना सविस्तर जाहिरात व अर्जाचा नमुना कदंबच्या संकेतस्थळावर उपलब्ध करून देण्यात आला आहे. भरती प्रक्रियेत निवड झालेल्या उमेदवारांची नियुक्ती सुरुवातीला एका वर्षाच्या कंत्राटावर केली जाईल. मात्र महामंडळाच्या गरजेनुसार हा कालावधी पुढे वाढविण्याची तरतूद करण्यात आली आहे.