पणजी: ‘जिवा मान्स अँड मिनरल्स लिमिटेड’ आणि इतरांविरुद्ध पैशांची अफरातफर केल्याच्या आरोपाखाली गुन्हा नोंद असून याच प्रकरणात अंमलबजावणी संचालनालयाने (ईडी) पीएमएलए, २००२ अंतर्गत २.२९ कोटी रुपये किमतीच्या तीन स्थावर मालमत्ता जप्त केल्या आहेत. यामध्ये दोन जमिनी आणि एका फ्लॅटचा समावेश असल्याची माहिती ईडीने दिली आहे.

गोवा पोलिसांच्या आर्थिक गुन्हे शाखेने नोंदवलेल्या प्रथम माहिती अहवालाच्या आधारे ईडीच्या पणजी विभागीय कार्यालयाने हा तपास सुरू केला होता. आरोपींविरुद्ध फसवणूक आणि विश्वासघाताचे गुन्हे दाखल करण्यात आले असून त्याबाबत आरोपपत्रही सादर करण्यात आले आहे.

तपासादरम्यान गुन्ह्यातील पैशांतून खरेदी करण्यात आलेले सिंधुदुर्ग जिल्ह्यातील सावंतवाडी येथील गालेल गावातील जमिनीचे दोन भूखंड आणि अंधेरी (पश्चिम) येथील एक निवासी फ्लॅट जप्त करण्यात आले आहेत. ईडीच्या तपासानुसार, संशयितांनी २०१० मध्ये ‘मेसर्स लाओ टिंग दाडी मोबाईल कंपोनंट्स कंपनी लिमिटेड’ या परदेशी कंपनीची सुमारे १३.४२ कोटी रुपयांची (२.९५ दशलक्ष यूएस डॉलर्स) फसवणूक केली होती.

या निधीचा वापर करूनच वरील मालमत्ता खरेदी करण्यात आल्याचे समोर आले आहे. संशयितांनी जमिनीची मालकी आणि खाणकामाच्या हक्कांबद्दल खोटी आश्वासने आणि चुकीची माहिती देऊन परदेशी कंपनीला ‘जिवा माइन्स अँड मिनरल्स लिमिटेड’ सोबत लोहखनिज उत्खनन आणि निर्यातीसाठी संयुक्त उपक्रम करण्यास प्रवृत्त केले होते.

खाणकाम आणि निर्यातीसाठी मोठा निधी प्राप्त होऊनही संशयितांनी कोणतेही उत्खनन किंवा निर्यातीचे काम केले नाही. त्याऐवजी, हा पैसा स्वतःच्या फायद्यासाठी वळवण्यात आला आणि त्यातून मालमत्ता खरेदी करण्यात आल्या. बँकेच्या व्यवहारांच्या सखोल विश्लेषणातून हा निधी कशाप्रकारे वळवण्यात आला आणि त्याचा वापर कसा झाला, हे स्पष्ट झाले आहे. या प्रकरणाचा पुढील तपास सध्या सुरू आहे.