पेडणे: कासारवर्णे येथील उमेश वरक या युवकाच्या हृदयावरील शस्त्रक्रियेसाठी महत्त्वाचे योगदान देऊन त्याला जीवनदान दिल्यानंतर मांद्रेचे आमदार जीत आरोलकर यांनी पार्से येथील चार वर्षांच्या मुलाच्या गुंतागुंतीच्या हृदय शस्त्रक्रियेसाठी मदत केल्याने त्याला नवजीवन लाभले.

आमदार जीत आरोलकर यांनी पुन्हा एकदा दातृत्वाची प्रचीती दिली आहे. चावदेवाडा-पार्से येथील आरव नागवेकर या चार वर्षे वयाच्या मुलाला हृदयाचा गंभीर आजार होता. त्याचे हृदय उजव्या बाजूला होते आणि हृदयाला छिद्र पडले होते.

गोव्यात त्याच्यावर उपचार होऊ शकत नसल्याने आई-वडिलांनी आरवला बेळगावातील एका खासगी इस्पितळात दाखल केले. डॉक्टरांनी त्यावर शस्त्रक्रिया करण्याचा उपाय सुचवला होता. सरकारी वैद्यकीय योजनेतून आरववर एक शस्त्रक्रिया झाली होती.

आरववर आणखी एक शस्त्रक्रिया करणे आवश्यक होते. पण सरकारी योजनेच्या उपलब्ध निधीमध्ये दुसरी शस्त्रक्रिया होऊ शकत नव्हती. शस्त्रक्रियेसाठी येणारा खर्च हा आई-वडिलांच्या आवाक्याबाहेरचा असल्याने ते हतबल झाले होते.

आरवच्या आई-वडिलांनी आमदार आरोलकर यांची भेट घेऊन त्यांना वस्तुस्थिती सांगितली. आरोलकर यांनी त्यांना धीर दिला, तसेच शस्त्रक्रियेसाठी येणारा सर्व खर्च करण्याचे आश्वासनही दिले. शनिवारी (ता.२८) आरववर दुसरी शस्त्रक्रिया यशस्वी झाली असून तो शुद्धीवरही आला. आमदार आरोलकर यांनी शनिवारी सकाळी बेळगाव येथे इस्पितळात जाऊन आरवची भेट घेतली. तसेच डॉक्टरांशीही चर्चा केली.