Goa Crime News: सर्व्हिस रिव्हॉल्व्हर साफ करत असताना चुकून गोळी झाडली जाऊन एक जण जखमी झाल्याचा प्रकार म्हापशातून समोर आला आहे. आरआरबी पोलिस उपनिरीक्षकाच्या (पीएसआय) अधिकाऱ्याच्या गिरी येथील घरात मंगळवारी रात्री हा प्रकार घडला आहे. यात या अधिकाऱ्याची पत्नी जखमी झाली आहे.

कुतुहलापोटी सरकारी पिस्तुल बघत असताना त्यातून अचानक गोळी सुटली. यात अधिकाऱ्याच्या पत्नीच्या मनगटातून गोळी आरपार जाऊन ती डाव्या मांडीत घुसली. या घटनेत त्यांचे मनगटाचे आणि मांडीचे हाड मोडले आहे. त्यांच्यावर गोमॅकॉमध्ये उपचार करण्यात आले. आता त्यांची प्रकृती स्थिर आहे.

दरम्यान, या घटनेची चौकशी करण्यात येत आहे. एकूणच या प्रकाराबाबत संशय व्यक्त केला जात आहे. म्हापसा पोलिसांनी प्राथमिक चौकशीला सुरवात केली आहे. पण, अद्याप अधिकाऱ्याच्या पत्नीचा जबाब नोंदवण्यात आलेला नाही. बंदुक साफ करताना चूकून गोळी झाडली गेली, इतकीच माहिती अद्याप समोर आली आहे.