पणजी: जमीन हडप प्रकरणातील मुख्य आरोपी तसेच विविध गुह्यात सहभागी असलेल्या सुलेमान खानला कोठडीतून पलायन करण्यास मदत करणाऱ्या आयआरबी कॉन्स्टेबलची नोकरीतून हकालपट्टी करण्यात आली आहे. कॉन्स्टेबल अमित नाईक शुक्रवारी उशीरा रात्री हुबळी येथे पोलिसांना शरण आला होता. पोलिसांनी त्याच्या विरोधात शिस्तभंगाची कारवाई करत नोकरीतून काढून टाकले.

भू-बळकाव प्रकरणातील सराईत सुलेमानला अमित नाईक याने गुन्हे शाखेच्या कोठडीतून बाहेर काढत स्वत:च्या दुचाकीवरुन फरार केले. दोघेही कर्नाटकच्या दिशेने गेल्याचे सीसीटीव्हीच्या फुटेजमधून समोर आले. खान फरार झाल्यानंतर पोलिस यंत्रणा अलर्ट मोडवर ठेवण्यात आली होती. दोघांच्या तपासासाठी पोलिसांची विविध पथके कर्नाटकात रवाना करण्यात आली. अखेर उशीरा रात्री हुबळी येथे अमित नाईक पोलिसांना शरण आला.

शरण आलेल्या अमित नाईकवर पोलिसांनी शिस्तभंगाची कारवाई करत नोकरीतून हकालपट्टी केलीय. सुलेमान खानला मदत करण्यासह इतर गोष्टीप्रकरणी अमित नाईकला कारवाईचा सामना करावा लागत आहे. दोघांनी पलायन केल्यानंतर रायबंदर येथील गुन्हे शाखेच्या कार्यालयात उच्च स्तरीय बैठक पार पडली होती. यावेळी नाईकवर योग्य कारवाई केली जाईल, अशी माहिती अधिकाऱ्यांनी दिली होती.

अमित नाईक कोण आहे?

नाईक या आडनावावरुन गोमंतकीय वाटणारा आयआरबीचा कॉन्स्टेबल अमित मूळचा कर्नाटकातील आहे. सध्या तो जयरामनगर- दाबोळी येथे राहायला असून, त्यांचा चांगला बंगला आहे. वडिलांचे मिक्सर दुरुस्तीचे दुकान आहे. याशिवाय काही दुकाने त्याने भाड्याने दिली आहेत. अमित कर्तव्यावर असताना इतरांवर दादागिरी करायचा असे माहिती समोर आलीय.