मडगाव: एकट्या-दुकट्या महिलांना हेरून त्यांच्या सोनसाखळ्या हिसकावून नेणारी पुण्यातील ‘इराणी गँग’ पुन्हा एकदा दक्षिण गोव्यात सक्रिय झाली असून, मायणा-कुडतरी पोलिसांनी आपल्या हद्दीत घडलेल्या एका चोरी प्रकरणात पुणे येथून याच गँगमधील एकाच्या मुसक्या आवळल्या. रहीम मिर्झा असे या संशयिताचे नाव असून, त्याला अटक करून पुढील चौकशीसाठी पाच दिवसांची पोलिस कोठडी घेतली आहे.

मायणा-कुडतरी पोलिस ठाण्याचे पोलिस निरीक्षक अरुण गावस देसाई पुढील तपास करीत आहेत. राय येथे बसथांब्यावर बसच्या प्रतीक्षेत उभ्या असलेल्या सुषमा शिरोडकर या महिलेची सोनसाखळी बुलेटवरून आलेल्या एका युवकाने हिसकावून पळ काढला होता.

या प्रकरणाचा तपास करताना पोलिसांना यात ‘इराणी गँग’ गुंतली असल्याची माहिती मिळाली होती. पोलिसांनी एक पथक पुणे येथे पाठवून दिले होते. या पथकाने रहीम याला पकडले.

दक्षिणेत उपद्रव

सोनसाखळी हिसकावून नेण्याच्या घटना घडत असतात. २०२४ साली येथे अशाप्रकारच्या ८ तर २०२३ साली १० घटना घडल्या होत्या. घटना वाढत असतानाही चोरटे पोलिसांच्या हाती लागत नसल्याने लोकही भयभीत झाले होते.

पोलिसांनी आता ‘इराणी गँग’च्या एकाला अटक केल्याने, यापूर्वी घडलेल्या अशा प्रकारच्या चोऱ्यांचा छडा लागेल, अशी आशा नागरिक बाळगून आहेत.