दाबोळी: गोव्यातील दाबोळी विमानतळावर शनिवारी (७ जून ) एक धक्कादायक घटना घडली. गोवा-सुरत विमानात चढत असताना एका प्रवाशाने विमानाच्या इमर्जन्सी एक्झिटचा फ्लॅप कव्हर उघडलं, ज्यामुळे तांत्रिक बिघाड झाला आणि इतर प्रवाशांच्या सुरक्षिततेला धोका निर्माण झाला. या गंभीर प्रकरणी दाबोळी विमानतळ पोलिसांनी गुन्हा दाखल केला आहे.

नेमके काय घडले?

इंडिगो एअरलाईन्सच्या इंटरग्लोब एव्हिएशन लिमिटेडच्या सहाय्यक व्यवस्थापक प्राजक्ता गावस यांनी या संदर्भात गुजरातच्या एका नागरिकाविरोधात तक्रार दाखल केली आहे.

या घटनेमुळे कोणतीही जीवितहानी किंवा दुखापत झाली नसली तरी, यामुळे काही काळ सुरक्षीची भीती निर्माण झाली होती. या कृतीमुळे विमानातील इतर प्रवाशांचे जीवन धोक्यात आले होते आणि सामान्य प्रक्रिया विस्कळीत झाली होती.

विमानाच्या इमर्जन्सी एक्झिटला हात लावणे किंवा उघडणे हे अत्यंत धोकादायक आणि नियमबाह्य कृत्य आहे.दाबोळी विमानतळ पोलिसांनी या प्रकरणाची गंभीर दखल घेतली असून, अधिक तपास सुरू आहे.

प्रवाशांनी विमान नियमांचे काटेकोरपणे पालन करावे, असे आवाहन विमान कंपन्या आणि सुरक्षा यंत्रणांकडून नेहमीच केले जाते.