दाबोळी: गोवा ते लखनऊ असा प्रवास करणाऱ्या इंडिगोच्या विमानामध्ये मंगळवारी (दि. 19 नोव्हेंबर) रोजी काही तांत्रिक अडचणी निर्माण झाल्याने हे विमान पुन्हा विमानतळावर उतरवण्यात आले. घडलेल्या एकूण तांत्रिक अडचणींमुळे प्रवाशांचा बराच खोळंबा झाला, त्यांना पर्यायी व्यवस्था करून देण्याची माहिती देण्यात आली होती मात्र विमान कंपनीकडून असे काहीही पाऊल उचलले न गेल्याने प्रवाशांनी संताप व्यक्त केला.

मंगळवारी संध्याकाळी 6:25 वाजता इंडिगो कंपनीच्या 6E, 6811 या विमानाने लखनऊसाठी उड्डाण केलं होतं, मात्र विमानाने भरारी घेतल्याघेतल्या काही तांत्रिक अडचणी निर्माण झाल्या आणि विमानाला पुन्हा मागे फिरावं लागलं. विमानामध्ये झालेल्या तांत्रिक अडचणींमुळे केवळ 20 मिनिटांमध्ये विमान पुन्हा दाबोळी विमानतळावर उतरवण्यात आलं.

दरम्यान प्रवाशांना बॅग घेऊन खाली उतरण्यास सांगितलं होतं मात्र तासभर लोटून सुद्धा इंडिगोच्या प्रवाश्यांसाठी पर्यायी व्यवस्था गेली गेली नाही. बराच वेळ वाट बघितल्यानंतर प्रवाशांनी गोंधळ सुरु केला आणि हा गोंधळ आटोक्यात आणण्यासाठी सुरक्षा कर्मचाऱ्यांना घटनास्थळी धाव घ्यावी लागली होती.

रात्री 9:15 वाजताच्या सुमारास विमानाची दुरुस्ती झाली असल्याचे सांगून प्रवाशांना पुन्हा बोर्डिंग करायला सांगितलं होतं. काही तांत्रिक बिघाडांमुळे गोवा ते लखनऊ प्रवास करणाऱ्या विमानाला मागे बोलवावं लागलं होतं मात्र ही अडचण दूर झाल्यानंतर विमानाने यशस्वी उड्डाण केल्याची माहिती विमानतळ संचालक एस. व्ही. टी. धनमंजन राव यांनी दिली.