Janata Darbar Vasco: जनता दरबार या कार्यक्रमाकडे वास्कोतील लोकांनी पाठ फिरवली. या शासकीय सोहळ्यात मोजकेच लोक उपस्थित होते. मात्र सरकारी अधिकाऱ्यांची मात्र गर्दी मोठ्या प्रमाणात दिसत होती.

जनता दरबारसाठी मिनी सभागृह सरकारी अधिकाऱ्यांनी तुडुंब भरले होते. जनता दरबारला जनताच नाही, अशी स्थिती होती. सकाळी केवळ ११.३० पर्यंत केवळ १६ नागरिकांनीच प्रश्न विचारण्यासाठी नोंदणी केली होती.

कोणत्याही स्थितीत मुरगाव बंदरात होणारी कोळसा हाताळणी बंद करा. हवे तर मी, तुम्हाला जनता दरबारात साष्टांग दंडवत घालतो, अशी आर्त विनवणी सामाजिक कार्यकर्ते शंकर पोळजी यांनी वीजमंत्री सुदिन ढवळीकर यांना आज रवींद्र भवन बायणा येथे झालेल्या जनता दरबारात केली. कोळसा हाताळणी रोखण्याच्या प्रश्‍नावर मंत्री सुदिन ढवळीकर निरुत्तर राहिले.

आज सोमवारी ४ सप्टेंबर रोजी बायणा रवींद्र भवनात जनता दरबार भरवला होता. यावेळी सामाजिक कार्यकर्ते शंकर पोळजी यांनी मंत्री सुदिन ढवळीकर यांच्यापुढे कोळसा प्रश्न उपस्थित केला. ढवळीकर यावर निरुत्तर झाले. यावेळी आमदार कृष्णा साळकर, संकल्प आमोणकर,जिल्हाधिकारी आश्विन चंद्र उपस्थित होते.