वेर्णा: बाईक रेसमध्ये फोंड्यातील तरुणाचा मृत्यू झाल्याची घटना समोर आली आहे. तर, दुसरा एक तरुण जखमी झाला आहे. वेर्णा औद्योगिक वसाहतीत अवैध पद्धतीने आयोजित करण्यात आलेल्या रेसमध्ये रविवारी (०८ डिसेंबर) सायंकाळी ही घटना घडली. अवैध रेस आयोजनावरुन पोलिस आणि आयोजकांवर प्रश्न उपस्थित केले जात आहेत.

मोहम्मद कैफ (वय २१, रा. फोंडा) असे या घटनेत मृत्यू झालेल्या तरुणाचे नाव आहे. तर, शुभम बाबाजान पंडारी (वय २४, रा. दत्तवाडी, फोंडा) असे या अपघातात जखमी झालेल्या तरुणाचे नाव आहे. मोटार वाहन कायद्यातंर्गत फोंडा पोलिसांनी याप्रकरणी गुन्हा नोंद केला असून, अधिक तपास केला जात आहे. दरम्यान, अवैध बाईक रेस कशी आयोजित केली तसेच, पोलिसांचे लक्ष नव्हते का? असे प्रश्न स्थानिकांकडून उपस्थित केले जात आहेत.

दोन वर्षापूर्वी रेसमध्ये मडगावच्या तरुणाचा झाला होता मृत्यू

एमआरएफ मोटोग्रीप सुपरक्रॉस ॲक्शन चॅम्पियनशीप स्पर्धेत रायडरचा मृत्यू झाल्याची घटना नोव्हेंबर २०२२ मध्ये उघडकीस आली होती. यात अल्ताब आलम हसन लाडजी (20, रा. घोगळ-मडगाव) याचा मृत्यू झाला होता. गोव्यातील ही पहिलीच घटना होती. यानंतर राज्यात आयोजित होणाऱ्या बाईक रेसबाबत प्रश्नचिन्ह उपस्थित होऊ लागले.

अवैध बाईक रेसिंगवर कोण ठेवणार नियंत्रण?

राज्यात अनेक ठिकाणी अवैध पद्धतीने बाईक रेसिंग आयोजित केल्या जातात. याकडे पोलिस आणि प्रशासनाचे दुर्लेक्ष होताना दिसते. यापूर्वी देखील अवैध बाईक रेसिंगमध्ये अपघाताच्या घटना उघडकीस आल्या आहेत. दरम्यान, अशा इव्हेंटवर नियंत्रण ठेवणे प्रशासन आणि पोलिसांसाठी आव्हान ठरत आहे.