जुने गोवा: जमीन घोटाळा प्रकरणातील कोठडीतून फरार झालेला आरोपी सुलेमान खानचा व्हिडिओ कसा मिळाला तसेच, आप नेते अमित पालेकरांनी व्हिडिओबाबत केव्हा संपर्क साधला? यावरुन काँग्रेस नेते सुनील कवठणकरांची ओल्ड गोवा पोलिसांकडून 2 तास चौकशी करण्यात आली. कवठणकरांना भारतीय न्याय संहिता कलम १७९ अंतर्गत नोटीस बजावण्यात आली होती.

कोठडीतून फरार झाल्यानंतर सुलेमान खान याने एक व्हिडिओ प्रसिद्ध केला. हा व्हिडिओ आप नेते अमित पालेकर यांच्या मदतीने काँग्रेस नेते सुनील कवठणकरांनी माध्यामांना दिला. यावरुन ओल्ड गोवा पोलिसांनी कवठणकरांची आज (१७ डिसेंबर) दोन तास चौकशी केली. सुलेमानचा व्हिडिओ कसा मिळाला, पालेकरांनी संपर्क कधी साधला? मी पोलिसांना सर्व माहिती दिलीय, माझ्याकडे लपण्यासारखे काहीच नाही, असे कवठणकर म्हणाले.

मी राहुल गांधींचा सैनिक आहे. सर्व विरोधक माझ्या समर्थनात आहेत. मी घाबरलो नाहीए, सर्वकाही पारदर्शक आहे. ही केस क्लिअर कट आहे, असे कवठणकर म्हणाले.

कठवणकरांना तीन व्हिडिओ असलेला एक पेन ड्राईव्ह मिळाला. त्यात सुलेमान खानचाही व्हिडिओ होता. यानंतर पोलिस महासंचालकांना संपर्क साधून माहिती दिल्याचे कवठणकरांनी सांगितले. व्हिडिओसाठी डिआयजी कडून फोन आला. पेन ड्राईव्ह घेऊन जाण्यासाठी पोलिस माझ्या घरी येणार होते, पण ते फारकाळ वाट पाहिल्यानंतरही ते आले नाहीत, असे कवठणकरांनी माध्यमांना सांगितले.