पणजी: हिंदी विषय शालेय अभ्यासक्रमातून काढून टाकण्यात आल्याचा समज पूर्णतः चुकीचा आहे. तो पूर्वीप्रमाणेच अभ्यासक्रमाचा भाग असल्याचे राज्य शैक्षणिक संशोधन आणि प्रशिक्षण परिषदेने (जीएससीईआरटी) स्पष्ट केले आहे. परिषदेच्या परिपत्रकाच्या आधारे ‘गोमन्तक’ने वृत्त प्रसिद्ध करताच आता ही सारवासारव केली आहे. परिषदेने म्हटले आहे की, ८ जून रोजी जारी करण्यात आलेले परिपत्रक केवळ शैक्षणिक दिनदर्शिकांच्या वितरणासंदर्भात होते.

दिनदर्शिका, वेळापत्रकातील फरकामुळे गैरसमज

शैक्षणिक दिनदर्शिका ही अध्यापन नियोजनासाठी मार्गदर्शक कागदपत्र असते, तर शाळांचे वेळापत्रक स्वतंत्रपणे तयार केले जाते. या दोन गोष्टींमध्ये फरक न समजल्याने हिंदी विषयाबाबत गैरसमज निर्माण झाल्याचे परिषदेने नमूद केले आहे.

त्याचा शाळांच्या वेळापत्रकाशी किंवा विषयांच्या अध्यापनाशी कोणताही संबंध नाही. शैक्षणिक दिनदर्शिका ही शिक्षकांना वर्षभराच्या अध्यापनाचे नियोजन करण्यासाठी मार्गदर्शक स्वरूपाची कागदपत्रे असतात, तर शाळांचे वेळापत्रक संबंधित शाळांकडून स्वतंत्रपणे तयार केले जाते.

केवळ एखाद्या यादीत किंवा दिनदर्शिकेत विषय दिसला नाही म्हणून तो अभ्यासक्रमातून वगळण्यात आला, असा निष्कर्ष काढणे चुकीचे असल्याचेही परिषदेने स्पष्ट केले आहे. सहावी, सातवी आणि आठवीसाठी हिंदी विषयाच्या शैक्षणिक दिनदर्शिका उपलब्ध असून त्या परिषदेच्या अधिकृत संकेतस्थळावर प्रकाशित करण्यात आल्या आहेत.