भाजप आमदारांनी सार्वजनिकरित्या एकमेकांची उणीदुणी काढणे बंद करावे, अशी ताकीद केंद्रीय गृहमंत्री अमित शहा यांनी पक्षाचे आमदार व सुकाणू समितीच्या सदस्यांच्या एका खास बैठकीत दिली. भाजपला स्वतःच्या ताकदीवर जिंकून आणण्याचे आवाहन करताना महाराष्ट्रवादी गोमंतक पक्षाबरोबर युती होणार नसल्याचे संकेत शहा यांनी दिले. आजच्या बैठकीत निवडणूक संदर्भात मार्गदर्शन करताना सर्व आमदारांना आणि नेत्यांना कठोर परिश्रम करून पूर्ण क्षमतेने पक्षाला विजयी करण्याचे आवाहन त्यांनी केले.

गोव्यात सत्ता पुन्हा येण्यासाठी 40 मतदारसंघासाठी तयारी करा, असे सांगताना अमित शहा म्हणाले, मागील निवडणुकीत ज्या जागांवर पराभव झाला, तो का झाला हेही समजून घ्या. त्या-त्या जागांची माहिती घ्या, तिथे नेमके काय प्रश्न आहेत हे जाणून घेऊन ते सोडवण्यासाठी प्रयत्न करावेत. याशिवाय शक्ती केंद्र आणि बुथस्तरीय कार्यकर्त्यांना सक्रिय करून त्यांच्याकडे विशिष्ट कुटुंबांची जबाबदारी द्या, अशा सूचनाही त्यांनी केल्या. कार्यकर्त्यांना सक्रिय करून केंद्र आणि राज्य सरकारच्या योजनांची माहिती पोहोचवावी आणि त्यांच्याकडून पाठपुरावा करून घ्यावा. असे झाले तरच भाजपला पूर्ण बहुमत मिळेल. हे सर्व करण्याची आणि पाहण्याची जबाबदारी विधिमंडळ सदस्यांची आहे, असेही शहा यांनी सांगितले.

अमित शहा यांच्या गोवा दौऱ्यातील ठळक घडामोडी

• केंद्रीय गृहमंत्री अमित शहा यांचे दाबोळी येथील नौदलाच्या हंस तळावर वायु सेनेच्या खास विमानाने शुक्रवारी दुपारी आगमन.

• धारबांदोडा येथे फॉरेन्सिक सायन्स विश्‍‍वविद्यालयाचे भूमिपूजन

• कुरापती थांबवल्‍या नाहीत, तर पुन्‍हा सर्जिकल स्ट्राईकचा पाकिस्तानला इशारा.

• पर्यटन व्यावसायिकांना 10 लाखांपर्यंत, तर टुरिस्ट गाईडना 1 लाखापर्यंत कर्ज योजना उपलब्ध करण्याची तसेच गोव्यात पर्यटकांची चार्टर विमाने उतरविण्याची ग्वाही.

• मुख्‍यमंत्री डॉ. प्रमोद सावंत यांच्‍या कामाचे भरूभरून कौतुक

• माजी मुख्यमंत्री व माजी संरक्षणमंत्री मनोहर पर्रीकर यांची प्रकर्षाने आठवण. पर्रीकरांनी गोव्याची खरी ओळख देशाला करून दिल्याचे गौरवोद्‍गार. ‘वन रँक वन पेन्शन’ पर्रीकर यांनी चालीस लावताना सर्जिकल स्ट्राईकद्वारे देशाची मान ताठ केल्याचे नमूद.

• ताळागावातील कार्यकर्ता मेळाव्यात पर्रीकरांच्या आठवणीने झाले भावूक.