पणजी: राज्यात मंगळवारपासून (२० मे) धुव्वाधार पाऊस कायम असून जनजीवन विस्कळीत झाले आहे. मुसळधार पडणाऱ्या पावसाने दाणादाण उडवून दिली आहे. अशीच स्थिती कायम राहिल्यास धोका अधिक वाढण्याची शक्यता आहे. राज्यातील अनेक भागात दरड कोसळणे, घरात पाणी शिरणे तसेच झाडे कोसळून दुचाकी आणि चारचाकी वाहनांचे मोठ्या प्रमाणात नुकसान घडण्याच्या घटना घडल्या आहेत.

पावसाची तीव्रता पाहता गोवा वेधशाळेने बुधवारी दुपारी १ वा. राज्यात रेड अलर्ट जारी केला असून नागरिकांनी योग्य ती काळजी घेण्याचे आवाहन करण्यात आले आहे. शक्यतो पावसात घराबाहेर पडणे टाळावे, असे आवाहन करण्यात आले आहे. पेडणे, मोरजी, सत्तरी, फोंडा, डिचोली मोठ्या प्रमाणात झाडाची पडझड झाली असून फोंडा, सोनारभाटात-रेईशमागूस येथे घरे जमीन दोस्त झाले आहे.

पणजीत झाड कोसळले!

पणजीतील उत्तर गोवा जिल्हाधिकारी कार्यालयाशेजारी असलेले भले मोठे झाड रस्त्यावर कोसळले. झाड कोसळल्याने कोणत्याही प्रकारची जीवितहानी झालेली नाही परंतु या झाडाखाली ठेवण्यात आलेल्या दुचाकींचे मोठ्या प्रमाणात नुकसान झाडे आहे. त्यातील एका नॉन गियर दुचाकीचे दुरवस्था झाली.

राज्यात कोठे काय घडले?

१) कासारवर्णे-पेडणे येथे वडाचे झाड कोसळून चारचाकीचे जबर नुकसान.

२) उत्तर गोवा जिल्हाधिकारी कार्यालयाशेजारी आंब्याचे झाड कोसळून दुचाकींचे मोठ्या प्रमाणात नुकसान.

३) सडा येथे रस्त्याशेजारील दरड कोसळली. गेल्यावर्षी देखील याच ठिकाणी दरड कोसळली होती.

४) गिरी येथे घरात पाणी शिरून मोठ्या प्रमाणात ४ नुकसान.

५) बागा येथे नव्याने उभारण्यात आलेल्या रेस्टॉरंटवर आंब्याचे झाड कोसळून मोठ्या प्रमाणात नुकसान.

महत्त्वाची सूचना

१) अरबी समुद्रात कर्नाटक किनारपट्टीजवळ वातावरणात चक्रीय स्थिती तयार झाली आहे.

२) शुक्रवारी (२३ मे) सकाळपर्यंत या क्षेत्राची तीव्रता वाढण्याचा अंदाज.

३) पुढील ३-४ दिवस गोव्यासह कोकण आणि मध्य महाराष्ट्रात वेगवान वाऱ्यासह पाऊस.

४) या कालावधीत समुद्रात मासेमारीसाठी जाऊ नये, किनारपट्टी आणि घाट क्षेत्रात पर्यटन टाळावे.