तांबडी-सुर्ल : तांबडी-सुर्ल, साकोर्डा भागात आज बुधवारी संध्याकाळी साडेतीनच्या सुमारास अचानक आभाळ काळ्‍याकुट्ट मेघांनी भरून आले व धो-धो पाऊस पडला. गडगडाट, लखलखाट आणि सोसाट्याच्‍या वाऱ्यासह अवकाळी पावसाने या परिसराबरोबरच धारगे, तयडे, बोळकर्णे, मधलावाडा, सुर्ला, सातपाल आदी परिसराला झोडपून काढले. आसपासच्या काही भागांतही पावसाच्या तुरळक सरी बरसल्या.

गेल्या काही दिवसांपासून तापमानात वाढ झाल्याने लोक हैराण झाले होते. मात्र आज अवेळी पडलेल्या पावसामुळे जीवाची लाहीलाही होणाऱ्या या लोकांना काही प्रमाणात दिलासा मिळाला. साधारणपणे पाऊण तास दमदार पाऊस पडला. दरम्‍यान, वादळी वाऱ्यांसह जोरदार पडलेल्या या पावसामुळे काजू, आंबा बागायतींत मात्र मोठे नुकसान झाले. त्यामुळे बागायतदारांनी चिंता व्‍यक्त केली आहे.

दरम्यान, केरळच्या (keral) किनाऱ्यापासून कोकण (kokan)किनाऱ्यापर्यंत त्याचप्रमाणे तटीय कर्नाटक प्रदेशात कमी दाबाचा पट्टा निर्माण झाल्याने येत्या तीन ते चार दिवसात गोवा राज्यात पाऊस पडण्याची शक्यता हवामान खात्याच्या वेधशाळेद्वारे (IMD Goa) वर्तवली होती. तर पणजी वेधशाळेचे वैज्ञानिक (Scientist) राहुल एम यांनी सांगितले, सत्तरी सांगे आदी सीमेलगतच्या तालुक्यात आज बुधवारी पाऊस पडण्याची शक्यता असून तापमानात (temperature) वाढ व हवेतल्या ओल्यामुळे पाऊस पडण्याची शक्यता असल्याचे सांगितले होते. तसेच नागरिकांनी मोकळ्या आभाळाखाली, खुल्या जागेत, शेतात तसेच उंच झाडाखाली आसरा घेणे टाळावे असे आवाहन गोवा हवामान खात्याकडून (Goa Meteorological Department) करण्यात आले होते.