मडगाव: वादळी वाऱ्यासह येणाऱ्या पावसामुळे सासष्टीच्या विविध भागात झाडे पडण्याच्या घटना घडल्या. बाणावली येथील पॅट्रोसी चॅपेलनजीक घरावर झाड कोसळून सुमारे दीड लाखाची हानी झाली. तसेच एका बकरीचा मृत्यू झाला तर घरातील एकाला किरकोळ दुखापत झाली. नुवे, मायणा-कुडतरी व मडगाव भागातही झाडे कोसळण्याच्या घटना घडल्या. मडगाव अग्निशमन दलाच्या जवानांनी घटनास्थळी जाऊन पडलेली झाडे हटविली.

अग्निशामक दलाच्या कार्यालयातून देण्यात आलेल्या माहितीनुसार, बाणावली येथील पॅट्रोसी चॅपेलनजीक दुपारी साडेतीन वाजण्याच्या सुमारास मोठे झाड जान्वारिओ रिबेलो यांच्या घरावर कोसळले. या घटनेत खाटेवर झोपलेल्या रिबेलो यांच्या डोक्याला मार लागला.

याशिवाय घराच्या छपरासह साहित्याचे नुकसान झाले. तसेच रिबेलो यांनी घराशेजारील शेडमध्ये पाळलेल्या बकऱ्यांपैकी एका बकरीचा मृत्यू झाला, एक जखमी झाली तर सुमारे १५ बकऱ्यांना सुखरूप बाहेर काढण्यात आले. या घटनेत अग्निशामक दलाने झाड बाजूला करत सुमारे दोन लाखांची मालमत्ता वाचवली.

दरम्यान, मायणा-कुडतरी येथील सेबी बारजवळील अंतर्गत रस्त्यावर चिंचेच्या झाडासह अन्य दोन झाडे कोसळली होती. सकाळी १० वा.पासून सव्वा एक वाजेपर्यंत झाड तोडून बाजूला करत रस्ता वाहतुकीसाठी मोकळा केला.

अग्निशमन दलाकडून मदतकार्य

नुवे येथे एका घरावर माड कोसळला. तर पाजीफोंड येथील अ‍ानाफोंत गार्डनजवळ एका स्टॉलवर झाड कोसळेले. पाजीफोंड येथील सपना प्लाझा इमारतीजवळ मुख्य रस्त्यावर झाड कोसळले. अग्निशामक दलाने झाड कापून रस्ता खुला केला. राय येथे वीज उपकेंद्राजवळील संरक्षक भिंतीवर आंब्याचे झाड कोसळले होते. झाड हटवत अग्निशामक दलाने २० हजारांची मालमत्ता वाचवली.