New Evidence of Striped Tiger in Goa Mhadei Contradicts Forest Departments Claims

पणजी: राज्यात पट्टेरी वाघ असल्याचे ठोस पुरावे पुन्हा एकदा मिळाले आहेत. परंतु राज्य सरकार एका बाजूने पुन्हा गोव्यातील ते वाघ नसल्याचे सांगत आहे. त्यावर पर्यावरण अभ्यासक राजेंद्र केरकर यांनी तीव्र शब्दात राज्य सरकारवर जोरदार टीका केली आहे. तसेच राज्य सरकार वाघ संरक्षणाबाबत प्रामाणिक नसल्याचेही त्यांनी निक्षून सांगितले.

केरकर यांनी ‘गोमन्तक टीव्ही‘ला दिलेल्या प्रतिक्रियेत म्हटले की, राज्य सरकारने काय म्हटले आहे, ते आपण ऐकले नाही. परंतु याविषयी गोवा सरकारचा काहीच अभ्यास नाही. मागील दोन वर्षांचा कॅमेरा ट्रॅपचा रेकॉर्ड पाहिल्यास आणि आपण माहिती अधिकार कायद्याखाली माहिती मागितल्यास त्यांनी गोव्यात वाघच नाहीत म्हणून सांगितले. २०२२ मध्ये राष्ट्रीय व्याघ्र गणना झाली, त्यातून पाच वाघ असल्याचे स्पष्ट झाले होते. गोवा राज्य सरकारने वाघ संरक्षणासाठी काहीच प्रयत्न केलेले नाहीत, असेही ते म्हणाले.

राष्ट्रीय व्याघ्र संरक्षण प्राधिकरणाने वाघ संरक्षणासाठी ज्या सूचना केल्या होत्या त्याची अंमलबजावणी वनखात्याने केलेली नाही. सरकार सतत वाघ नाहीत म्हणून सांगत राहिले, परंतु चार वाघ मारले त्याची सरकारलाही माहिती नव्हती. आपण वनखात्याला फोन करून त्याची माहिती दिली, तेव्हा त्यांना जाग आली,असे केरकर म्हणाले.

‘तो व्‍हिडिओ जुना व गोव्‍यातील नव्‍हेच’

म्हादई वन्यजीव अभयारण्यात वाघिणी आणि तिच्या तीन बछड्यांचा व्हिडिओ सोशल मीडियावर व्हायरल झाला होता. मात्र, हा व्हिडिओ जुना असून तो गोव्याचा नसल्याचे मुख्य वन्यजीव संरक्षक उमाकांत यांनी स्पष्ट केले आहे. उमाकांत यांनी जारी केलेल्या पत्रकात विभागाने अलीकडच्या काळात अशा प्रकारचे कोणतेही निरीक्षण नोंदवले नसल्याचे म्हटले आहे. वन्यजीव क्षेत्राचे निरीक्षण करण्यासाठी विभागाकडे २९ संरक्षण कॅम्प कार्यरत आहेत. या कॅम्पमधूनही वाघांच्या कोणत्याही हालचालींचे पुरावे मिळालेले नाहीत.