Ravindra Bhawan: मडगाव, मुरगाव आणि कुडचडे येथील रवींद्र भवनात संगीत, नृत्य आणि नाट्यकलेचे प्रशिक्षण वर्ग सरकारने अजूनही सुरू केलेले नाहीत, अशी धक्कादायक माहिती समोर आली आहे. राज्‍यातील होतकरू कलाकारांना विविध कला प्रकारांत योग्य प्रशिक्षण देण्यात ‘आयएसओ’ प्रमाणित कला-संस्कृती खात्यातर्फे संचालित रवींद्र भवन पूर्णपणे अपयशी ठरली आहेत.

नुकत्याच संपलेल्या विधानसभा अधिवेशनात विरोधी पक्षनेते युरी आलेमाव यांनी मांडलेल्या तारांकित प्रश्न क्रमांक १३३ला कला-संस्कृतीमंत्री गोविंद गावडे यांनी दिलेल्या उत्तरात ही माहिती उघड झाली आहे. आश्चर्याची गोष्ट म्हणजे, मंत्र्यांनी अतारांकित प्रश्न क्रमांक १४७ ला २० जुलै २०२२ रोजी दिलेल्या उत्तरात राज्यातील रवींद्र भवनांमध्ये संगीत आणि नृत्याचे वर्ग सुरू करण्यात आल्‍याची माहिती दिली होती.

राज्य विधानसभेला दिलेल्या माहितीवरून असे दिसून येते की, मडगाव, कुडचडे आणि मुरगाव येथील रवींद्र भवनात आजपर्यंत संगीत, नृत्य व नाट्यकलेचे प्रशिक्षण देणारे कोणतेही अभ्यासक्रम उपलब्ध नाहीत.

विशेष म्‍हणजे गोव्याचे सांस्कृतिक केंद्र म्हणून मडगाव शहराची ओळख आहे.

प्रशिक्षणार्थी २२३५, शिक्षक केवळ २५

कला-संस्कृती खात्याकडे १८० संगीत प्रशिक्षक आहेत. पैकी १७८ कंत्राटी पद्धतीवर तर दोघेजण कायमस्वरूपी नोकरीत आहेत. १९२ संगीत साथीदार कंत्राटी पद्धतीवर आहेत, ६ जण कायमस्वरूपी आहेत. खात्यात नाट्यप्रशिक्षण घेणाऱ्या २२३५ विद्यार्थ्यांसाठी केवळ २५ शिक्षक उपलब्ध असल्याची माहिती कला-संस्कृतीमंत्री गावडे यांनी आपल्या उत्तरातून दिली आहे.