Mapusa News परराज्यातील पोलिसांकडून होणाऱ्या छळणुकीच्या निषेधार्थ उत्तर गोव्यातील सुवर्णकारागिरांनी आपले आंदोलन सुरूच ठेवले आहे. याचाच भाग म्हणून या कारागिरांनी तीन दिवस स्वतःची दुकाने बंद ठेवण्याचा निर्णय घेतला आहे.

अखिल गोवा दैवज्ञ सुवर्णकारागिर संघटनेच्या नेतृत्वाखाली संघटनेच्या उत्तर गोवा शाखेच्या सदस्यांनी या आंदोलनात सहभाग घेतलाय. त्यानुसार 13 ते गुरुवार 15 जूनपर्यंत हे दुकान बंद आंदोलन राबवले आहे.

गेल्या काही महिन्यांपासून म्हापशासह उत्तर गोव्यातील कारागिरांना चोरट्यांकडून चोरीचे दागिने खरेदी केल्याच्या नावाखाली देशातील काही राज्यांतील पोलिसांनी छळ चालवला आहे.

चोरट्यांना गोव्यात आणून कोणत्याही दुकानासमोर उभे केले जाते व त्या दुकानदारांकडून दागिने वसुलीच्या नावे लुबाडणूक करण्याचा प्रकार सर्रासपणे चालू आहे. यासाठी खाकी वर्दीचा धाक दाखवला जातो, असा आरोप या कारागिरांनी केला आहे.

हा एकंदरीत प्रकार गोव्यातील सुवर्णलंकार व्यवसाय नष्ट करणारा आहे. याचा निषेध म्हणून गेल्या पंधरावड्यापासून सुवर्णलंकार कारागिरांनी राज्यात आंदोलन छेडले आहे. याचाच भाग म्हणून तीन दिवस हे दुकान बंदचे आंदोलन छेडले आहे, असे या संघटनेच्या सदस्यांनी सांगितले.