Bodgeshwar Temple: म्हापसा येथील श्री देव बोडगेश्वरला मंत्री विश्वजित राणे यांच्याकडून माजी मुख्यमंत्री प्रतापसिंह राणे यांच्या वाढदिवसानिमित्त सोन्याची मशाल आज अर्पण करण्यात आली. यावेळी त्यांच्यासोबत त्यांच्या पत्नी आमदार डॉ. देविया राणे उपस्थित होत्या.

मंत्री राणे यांनी यंदा जत्रोत्सवावेळी देवदर्शन घेतल्यानंतर आपल्या वडिलांच्या वाढदिनी देवाला सोन्याची मशाल अर्पण करण्याची इच्छा व्यक्त केली होती. त्यानुसार त्यांचे वडील माजी मुख्यमंत्री प्रतापसिंह राणे यांचा आज 28 रोजी वाढदिवस असल्याने ही मशाल देवाला अर्पण करण्यात आली.

यानिमित्त मंदिरात लघुरूद्र व मशालीचे शुद्धीकरण करण्यात आले. यानंतर सदर मशाल देवस्थानाकडे सुपूर्द करण्यात आली.

याबाबतची माहिती आमदार डॉ. देविया राणे यांनी ट्विट करत दिली. त्या म्हणाल्या,"श्री प्रतापसिंह राणे यांच्या वाढदिवसानिमित्त आम्ही म्हापसा येथील मंदिरात देव बोडगेश्वरला सोन्याची मशाल अर्पण केली. या शुभ दिवशी मशाल दान करण्याचा अत्यंत आनंदाचा आणि सन्मानाचा क्षण आहे. यावेळी आम्ही गोव्यातील लोकांच्या कल्याणासाठी आणि उत्तम आरोग्यासाठी प्रार्थना केली."