मडगाव: सोन्याचे दागिने हिसकावल्याप्रकरणी आरोपी अशोक घारात याला मडगावच्या न्यायालयाने तीन महिन्यांची कैदेची शिक्षा ठोठावली.

या आरोपीला कोकण रेल्वे पोलिसांनी ४ सप्टेंबर २०२५ रोजी अटक करून त्याच्याविरुद्ध भारतीय न्याय संहितेच्या ३०३ ( २ ) व ३०४ कलमाखाली गुन्हा नोंद केला होता. सध्या तो न्यायालयीन कोठडीत होता.

मडगावच्या प्रथम न्यायदंडाधिकारी वैशाली लोटलीकर यांच्या न्यायालयात या खटल्याची सुनावणी झाली. सरकारपक्षातर्फे सरकारी वकील एस. नाईक यांनी न्यायालयात काम पाहिले.आरोपीचा गुन्हा न्यायालयात सिद्ध झाल्यानंतर न्यायालयाने आरोपीला दोषी ठरवले. त्यानंतर आरोपीला किती शिक्षा देण्यात यावी यावर न्यायालयात सुनावणी झाली.

दोन्ही पक्षांचा युक्तिवाद ऐकल्यानंतर न्या. लोटलीकर यांच्या न्यायालयाने आरोपीला ३ महिने १२ दिवसांची साधी कैद व ५०० रु. दंडाची शिक्षा ठोठावली. दोन्ही शिक्षा एकावेळी भोगायच्या आहेत. दंड न भरल्यास आणखी तीन दिवसांची अतिरिक्त साधी कैद भोगावी लागणार आहे.

चौकशी अधिकाऱ्यालाही काढले वॉरंट

या प्रकरणातील मुद्देमालासंबंधी न्यायालयाने पोलिस अधिकाऱ्याला न्यायालयात हजर राहण्यासाठी नोटीस पाठवली. तसेच फोनवरून संदेश पाठवण्यात आला होता. तरीही हा अधिकारी १२ डिसेंबर रोजी न्यायालयात हजर राहिला नाही. मुद्देमालावरून संशयितावरील आरोप निश्चित करता येत नव्हते. परिणामी या प्रकरणातील चौकशी अधिकाऱ्याला वॉरंट काढून न्यायालयात आणले.