मडगाव : नोकरी करण्याच्या निमित्ताने फक्त पाच महिन्यापूर्वीच युक्रेनच्या गेलेला आणि तिथे गेल्यावर युद्धात अडकून पडलेला कुडतरी येथील जोमार्क डायस हा 22 वर्षीय गोमंतकीय युवक सध्या युक्रेनची सीमा ओलांडून पोलंड देशात पोहोचल्याने त्याच्या कुटुंबियांचा जीव भांड्यात पडला आहे. (Goan Youth Stucked in Ukraine News Updates)

जोमार्कची आई मारिया डायस यांनी या वृत्ताला दुजोरा दिला. 'देवाच्या दयेने माझा मुलगा पोलंड मध्ये सुखरूप पोहोचला आहे. पण तो लवकरात लवकर गोव्यात पोहोचावा हीच आमची इच्छा आहे. पैशांच्या अभावी तो पोलंडमध्ये (Poland) अडकून पडू नये यासाठी आम्ही त्याच्यासाठी पैशांची सोयही केली आहे',असे तिने सांगितले.

आपले नशीब आजमावण्यासाठी तो युक्रेनला नोकरीच्या शोधात गेला होता पण त्याच्या वाईट नशिबाने तो या युद्धात सापडला.

दरम्यान बोर्डा मडगाव (Madgaon) येथील अनेक्सा फेर्नांडिस आणि फोंड्याची कॅरन फर्नांडिस या युक्रेनला अडकून पडलेल्या दोन गोमंतकीय विद्यार्थीनी आज सुखरूप गोव्यात (Goa) पोहोचल्याने त्यांच्या पालकांनी सुटकेचा श्वास सोडला. आपली मुले युद्धभूमीत अडकल्यामुळे त्यांचा जीव टांगणीला लागला होता.