पर्यटकांची पावले वळली दक्षिण गोव्याकडे

मडगाव : राज्यात देशी पर्यटक दाखल होऊ लागले असून दक्षिण गोव्यातील कोलवा, बाणावली, वार्का, सुरावलीसह इतर समुद्रकिनाऱ्यांवर या पर्यटकांची रेलचेल दिसून येत आहे. त्यामुळे येथील व्यावसायिकांमध्ये आनंदाचे वातावरण पसरले आहे. (Tourist in Goa News Updates)

कोरोनाच्या पहिल्या टप्प्यात हे समुद्र किनारे पर्यटक नसल्याने सुनेसुने झाले होते. त्यानंतर काहीसे कोरोनाचे सावट कमी झाल्याने डिसेंबर 2021 मध्ये नवे वर्ष साजरे करण्यासाठी अनेक पर्यटक दाखल झाले होते. जानेवारी 2022 वर्षाच्या मध्यावर तिसऱ्या लाटेचे गोव्यात (Goa) आगमन झाल्याने पुन्हा पर्यटकांनी गोव्याकडे पाठ फिरविली होती. तसेच राज्यात विधानसभेच्या निवडणूक असल्यानेही पर्यटकांच्या संख्येवर परिणाम झाला होता. आता पुन्हा पर्यटक किनाऱ्यांवर दाखल होत असल्याने येथील व्यावसायिकांनीही समाधान व्यक्त केले आहे.

रेडिमेड कपडे आणि स्थानिक वस्तूंची विक्री करणाऱ्या व्यावसायिकांनीही याबाबत समाधान व्यक्त केलं आहे. कोरोनामुळे (Corona) येथील व्यवसाय ठप्प होता. मागील दीड वर्षे पर्यटक नसल्याने नुकसानात दिवस काढावे लागले होते. फेब्रुवारीच्या दुसऱ्या आठवड्यानंतर पर्यटक येत असून हळूहळू येथील व्यवसायात जम बसत आहे, असं व्यावसायिकांनी स्पष्ट केलं आहे.

कोरोनाच्या काळात पर्यटक (Tourist) नसल्याने व्यवसायाअभावी जगणे कठीण झाले होते. गाडी बँकेकडून कर्जावर घेतली आहे. पण पर्यटक नसल्याने बँकेचे हफ्ते थकले होते. आता स्थिती सुधारत असून देशी तसेच विदेशी पर्यटकांमुळे काही प्रमाणात व्यवसायास सुरुवात झाली आहे. त्यामुळे व्यावसायिकांमध्ये समाधान असल्याचं खासगी टॅक्सी चालकांचं म्हणणं आहे.