Yuri Alemao सरकारचे सर्व खात्यांवरील नियंत्रण सुटले असून राज्यात सध्या स्वैराचा माजला आहे. खून, बलात्कार, दरोडा, अपघात या घटना दैनंदिन घडत असून प्रमोद सावंत सरकार यावर नियंत्रण ठेवण्यात सपशेल अपयशी ठरलं असल्याची टीका काँग्रेसचे युरी आलेमाव यांनी गोमंतकशी बोलताना केली.

'245 दिवसात 195 जणांचे मृत्यू' हे आकडेच सरकारचे अपयश दाखवतात. सरकारच्या निद्रिस्तपणामुळे लोकं हकनाक जीव गमावत आहेत. वाहतूक खात्याला विनंती करूनही अद्याप राज्यातीलअपघातप्रवण क्षेत्रं निश्चित करण्यात आली नाहीत.

तसेच जे वाहतुकीचे नियम मोडून गाडी चालवतात त्यांच्यावर कोणतीही कारवाई होताना दिसत नाही. जे दारू पिऊन बेदरकारपणे गाड्या चालवतात त्यांच्याकडे सरकारचं पूर्णतः दुर्लक्ष झाले असून रस्ते अपघात रोखण्यातही सावंत सरकार पूर्णतः अपयशी ठरलं आहे.

त्याचप्रमाणे खून, विनयभंग, बलात्कार या घटनांविषयी बोलताना आलेमाव म्हणाले, गृहखात्याला अशा घटनांना आवर घालणे कठीण बनत चालले आहे. राज्यातील पोलीस यंत्रणा अशा घटना थोपवू शकते मात्र त्यांना बंधनात ठेवले जाते.

त्यामुळेच कायदा - सुव्यवस्थेचा बोजवारा उडालेला असून मुख्यमंत्र्यांना याचे उत्तर जनतेला द्यावे लागेल.बाणस्तारी प्रकरणातही पोलिसांवर दबाव आणून तपास केला गेला.

विधानसभेत परप्रांतीयांच्या वाढत्या गुन्हेगारीचा प्रश्न उपस्थित झाला होता. मात्र यामागील सत्य हे समोर आले कि, अशा घटनांमध्ये फार कमी गुन्ह्यांची नोंद केली गेली. थोडक्यात मुख्यमंत्र्यांना गुन्हेगारी रोखणे जमत नाहीय त्यांचे खात्यांवरील नियंत्रण आणि वचक पूर्णतः सुटला आहे.