पणजी: राज्यात गेल्या काही दिवसांपासून उष्म्याच्या झळा वाढू लागल्या असून नागरिक उकाड्यामुळे हैराण झाले आहेत. बुधवारी कमाल तापमानाचा पारा ३३.६ अंश सेल्सिअसवर पोहोचला, जो मागील दिवसापेक्षा सुमारे १ अंशांनी वाढला आहे.

तापमानात वाढ असली, तरी वाढत्या आर्द्रतेमुळे उष्म्याची तीव्रता अधिक जाणवत आहे. कमाल आर्द्रता ८१ टक्क्यांपर्यंत पोहोचली आहे. पुढील चार दिवसांत कमाल तापमान ३३ ते ३४ अंश सेल्सिअसदरम्यान राहण्याची शक्यता असून आर्द्रता ९० टक्क्यांपर्यंत जाण्याचा अंदाज वर्तविण्यात आला आहे. राज्यातील हवामान मुख्यतः कोरडे राहील; मात्र काही भागांत ढगाळ वातावरण राहण्याची शक्यता आहे.

दुपारच्या उन्हापासून दूर राहा

दुपारी १२ ते ४ या कालावधीत उष्म्याच्या झळा अधिक तीव्र असतात. त्यामुळे या वेळेत शक्यतो थेट उन्हात जाणे टाळावे, असे आवाहन करण्यात आले आहे. नागरिकांनी उष्माघात टाळण्यासाठी आवश्यक काळजी घ्यावी.

उष्ण व जड पदार्थांचे सेवन टाळून हलका व संतुलित आहार घ्यावा. उष्माघाताची लक्षणे जाणवल्यास त्वरित डॉक्टरांचा सल्ला घ्यावा, असेही सांगण्यात आले आहे.