Goa Monsoon Update 2023 कोकण ते केरळ किनारपट्टीदरम्यान निर्माण झालेला कमी दाबाचा पट्टा आणि भारतीय उपखंडाच्या मध्यावरील ऑफशोर ट्रफ्समुळे गोव्यासह कोकण किनारपट्टीत पुढील पाच दिवस ‘ऑरेंज अलर्ट’ जारी केल्याने मुसळधार पावसाची शक्यता आहे.

हवामान खात्याच्या वेधशाळेने दिलेल्या अनुमानानुसार, पुढील पाच दिवस मुसळधार पाऊस पडण्याची शक्यता असल्याने नागरिकांनी योग्य ती काळजी घेत सतर्क राहावे. राज्यात गेल्या आठवडाभरापासून पावसाने जोर धरला आहे.

तसेच पुढील दोन आठवडे राज्यात मुसळधार पावसाची शक्यता वर्तविली आहे. गेल्या २४ तासांत राज्यात एकूण 84 मि.मी. म्हणजेच 3.30 इंच पाऊस पडला. आतापर्यंत राज्यात एकूण 739 मिलीमीटर म्हणजेच 30 इंच पाऊस पडला आहे.

देशात जुलैमध्ये सरासरीएवढा पाऊस पडण्याची शक्यता आहे. बंगालच्या उपसागरात कमी दाबाचे क्षेत्र निर्माण झाल्यास 7 जुलैनंतर पावसाचा जोर वाढण्याचा अंदाज आहे.

युवक बचावला

शुक्रवारी रात्री वादळी वाऱ्यासह झालेल्या पावसामुळे अनेक ठिकाणी पडझडीच्या घटना घडल्या. शनिवारीही पडझड सुरूच होती. नास्नोळा येथे झाड पडल्यामुळे रामनाथ वायंगणकर हा दुचाकीस्वार जखमी झाला. शिवाय डिचोली, म्हापसा, वाळपई या तालुक्यांमध्ये पडझडीच्या अनेक घटना घडल्या.