IMD Goa Weather Update

पणजी: राज्यात ६ आणि ७ मे २०२५ रोजी वादळी पावसाची शक्यता व्यक्त करण्यात आली असून, हवामान खात्याने यासाठी यलो अलर्ट जारी केला आहे. या काळात राज्यातील विविध भागांत ३० ते ४० किलोमीटर प्रतितास वेगाने वारे वाहण्याची शक्यता असून, काही ठिकाणी गडगडाटासह पावसाचीही नोंद होऊ शकते.

राज्यात मागील काही दिवसांपासून हवामानात सातत्याने बदल होत असून, याचा थेट परिणाम नागरिकांच्या दैनंदिन जीवनावर आणि शेतीवर दिसून येत आहे.

एकीकडे तापमान वाढून उकाडा जाणवतो आहे, तर दुसरीकडे अचानक पावसाचे सत्र सुरू होते. यामुळे शेतकरी, बागायतदार आणि सामान्य नागरिक प्रचंड चिंतेत आहेत.

हवामान खात्याच्या ताज्या अंदाजानुसार, गोव्यात पुढील दोन दिवसांत पावसाचे प्रमाण काही प्रमाणात वाढू शकते. या अस्थिर हवामानाचा सर्वाधिक फटका फळबागांना बसू शकतो. आंबा, काजू आणि अन्य हंगामी फळपिके यावर या पावसाचा परिणाम होण्याची भीती आहे.

हवामानातील सततच्या बदलामुळे जनजीवनही विस्कळीत झाले आहे. नागरिकांनी सतर्क राहून अनावश्यक प्रवास टाळावा, असे आवाहन स्थानिक प्रशासन आणि हवामान खात्याने केले आहे.