Goa University: गोवा विद्यापीठाच्या निवडणूक प्रक्रियेत त्रुटी राहिल्याने निवडणूक रद्द करण्यात आली आणि आता पुन्हा निवडणूक जाहीर करण्यात आली आहे. यातही गोवा विद्यापीठ प्रशासनाद्वारे घोळ घालण्यात आला आहे.

तसेच निवडणुकीच्या नावाखाली राजकीय पक्षांशी संबंधित असणारे ‘राजकारणी प्राध्यापक’ प्रसिद्धीच्या झोतात येऊ पाहत असल्याचा आरोप अखिल भारतीय विद्यार्थी परिषदेच्या संयोजक धनश्री मांद्रेकर यांनी केला आहे.

अभाविप कार्यालयात आयोजित पत्रकार परिषदेत त्या बोलत होत्या. यावेळी पणजीचे संयोजक वैभव साळगावकरही उपस्थित होते.

विद्यापीठात तणावाची शक्यता

गोवा विद्यापीठात गुरुवार, 14 रोजी विद्यार्थी प्रतिनिधी निवडणूक प्रक्रिया सकाळी 11 ते दु. 1 वा.च्या दरम्यान पार पडणार आहे तसेच त्याचवेळी निकाल जाहीर करण्यात येणार आहेत.

मागील महिन्याभरातील विद्यापीठ निवडणुकीसंदर्भातील घटना पाहता विद्यापीठात निवडणूक प्रक्रियेदरम्यान किंवा निकालावेळी तणाव होण्याची शक्यता नाकारता येत नाही.