पणजी: चार रिक्त जागा आणि एकच पात्र उमेदवार अशी परिस्थिती असतानाही राष्ट्रीय प्रवेश परीक्षेद्वारे (एनईटी) ‘पीएचडी’ प्रवेशासाठी तसेच साहाय्यक प्राध्यापक पदासाठी पात्र ठरलेल्या उमेदवाराला गोवा विद्यापीठाच्या कोकणी विभागाने प्रवेश नाकारल्याचा प्रकार समोर आला आहे.

संबंधित उमेदवाराने ‘लोकजीवन आणि सांस्कृतिक अभ्यास’ या विषयात पदव्युत्तर शिक्षण पूर्ण केले असून, राष्ट्रीय प्रवेश परीक्षेच्या पहिल्याच प्रयत्नात यश मिळवले होते. त्यानंतर त्याने ‘पीएचडी’ प्रवेशासाठी गोवा विद्यापीठाच्या शणैं गोंयबाब अभ्यास केंद्रात अर्ज केला होता.

मात्र, पात्रता असूनही प्रवेश नाकारण्यात आल्याने या निर्णयावर प्रश्न उपस्थित झाले आहेत. उमेदवाराने विद्यापीठाच्या नियमांनुसार आवश्यक पात्रता पूर्ण केली असल्याचे सांगितले असून, प्रवेश प्रक्रियेत पारदर्शकता ठेवण्याची मागणी केली आहे. या प्रकरणामुळे विद्यापीठातील ‘पीएचडी’ प्रवेश प्रक्रियेबाबत चर्चा सुरू झाली आहे.

‘पीएचडी’च्या चार जागा रिक्त कशा?

वास्तविक कोकणी विभागात पीएच.डी.साठीच्या चार जागा रिक्त का राहतात, हाच चिंतेचा विषय होऊ शकतो. त्यातून कोकणी भाषा व कोकणीतील संशोधनाचे जे चित्र उभे राहते, ते विद्यापीठाच्या कोकणी विभागासाठी लाजीरवाणे नाही काय? कोकणी विभागाने खरे तर अभ्यासकांना संशोधनासाठी प्रोत्साहन दिले पाहिजे. मात्र, या अभ्यासकेंद्राची भूमिका नेमकी उलटी दिसते. सामाजिक भेदभावांचा शिक्षणाच्या क्षेत्रावरील प्रभाव ही शिक्षण क्षेत्रातील एक मोठी समस्या आहे, असे तज्ज्ञ मानतात. हे प्रकरण त्याचे प्रातिनिधिक उदाहरण ठरू शकते.