मडगाव: बड्डे - मडगाव येथील रस्ता अपघातात मृत पावलेल्या एका युवकाच्या पालकांना मोटार अपघात दावा न्यायाधिकरणाने ३९ लाख रुपये भरपाई देण्याचा आदेश दिला. ५ डिसेंबर २०१७ रोजी बड्डे येथे अपघात होऊन इंझमाम शेख या एकोणीस वर्षीय युवकाचा दुर्दैवी मृत्यू झाला होता. या अपघात प्रकरणी त्याच्या पालकांना ३९,०४,३०० रुपये भरपाई देण्याचा आदेश राम प्रभुदेसाई यांच्या न्यायालयाने जारी केला.

मृत इंझमाम हा रोझरी महाविद्यालयाचा बीबीएचा विद्यार्थी होता आणि अर्धवेळ नोकरी करून कुटुंबाला हातभार लावत होता. ५ डिसेंबर रोजी रात्री ११.२० वाजण्याच्या सुमारास बड्डे येथील नॉर्बर्ट जीमजवळ हा अपघात घडला होता. संदीप होन्नावरकर याने आपली मोटारसायकल निष्काळजीपणे आणि चुकीच्या बाजूने चालवत समोरून येणाऱ्या दुचाकीला धडकली आहे.

या अपघातात दुचाकीचालक इंझमाम शेख गंभीर जखमी झाला होता आणि उपचारादरम्यान त्याचा मृत्यू झाला, तर स्कूटीवरील सहप्रवासी मेहरीन मुल्ला हिला किरकोळ दुखापत झाली होती. मृत इंझमाम यांचे वडील शेख महमद इक्बाल आणि आई मुमताज मुल्ला यांनी या अपघात प्रकरणी न्यायालयात दाद मागितली होती.

विमा कंपनीने केलेला आक्षेप फेटाळत न्यायालयाने मानले की, सदर युवक हुशार होता आणि त्याचे भविष्य उज्ज्वल होते. त्यामुळे न्यायालयाने सर्व बाजूंचा विचार करून नुकसान भरपाई, भविष्यातील संधी आणि इतर खर्चासह एकूण ३९ लाख ४ हजार ३०० रुपये संयुक्तपणे भरण्याचे आदेश वाहनचालक, मालक आणि बजाज अलायंझ जनरल इन्शुरन्स कंपनीला दिले आहेत. या रकमेवर अर्ज दाखल केल्याच्या तारखेपासून ६.८० टक्के दराने व्याजही द्यावे लागणार