वास्को: गोव्यात येणाऱ्या पर्यटकांशी भाडेदरांबाबत हुज्जत घालून गोव्याची बदनामी करणाऱ्या टॅक्सीचालकांवर कठोर कारवाई करण्यात येईल, असा स्पष्ट इशारा वाहतूकमंत्री माविन गुदिन्हो यांनी दिला. तसेच ‘ओला’ आणि ‘उबेर’सारख्या अ‍ॅपआधारित अ‍ॅग्रीगेटर्सचे गोव्यात स्वागत केले जाणार नसल्याचेही त्यांनी स्पष्ट केले.

‘मुख्यमंत्री गोंयचो टॅक्सी पात्रांव’ योजनेच्या पाचव्या टप्प्यातील लाभार्थ्यांना ५० नवीन सीएनजी-चलित टॅक्सी सुपूर्द करण्याचा कार्यक्रम वेर्णा येथील ह्युंदाई शोरूममध्ये आयोजित करण्यात आला होता. या सोहळ्यात मंत्री गुदिन्हो बोलत होते. ते म्‍हणाले, ओला व उबेरच्या कार्यपद्धतीचा अभ्यास करताना अनेक गोष्टी उघडकीस आल्या आहेत. त्या दोन्ही कंपन्या काही गंभीर समस्यांना तोंड देत आहेत. त्यांचे मॉडेल गोव्यात चालू शकत नाही.

मुख्यमंत्री डॉ. प्रमोद सावंत यांनी सुरू केलेली ही योजना आज देशातील एक आदर्श ठरली आहे. गोवा माईल्सनेही या योजनेच्या यशात मोठा वाटा उचलला आहे. गोवा माईल्सकडे आता पाच हजार टॅक्सी आहेत आणि त्यांनी तब्बल एक कोटी प्रवासी हाताळले आहेत, अशी माहिती मंत्री गुदिन्हो यांनी दिली.

या योजनेअंतर्गत असलेले ३०० लाभार्थी दरमहा अंदाजे एक लाख रुपये कमवतात. ही बाब देशभरात अनुकरणीय ठरेल याबद्दल त्यांनी विश्वास व्यक्त केला. दरम्‍यान, तत्‍पूर्वी आपण ‘ओला’ व ‘उबेर’संबंधी इतर राज्यांतील टॅक्सीचालकांशीही संवाद साधल्याची माहिती गुदिन्‍हो यांनी दिली.

काही स्थानिक टॅक्सीचालक गोवा माईल्सच्या टॅक्सी अडवतात. त्यामुळे पर्यटक आणि प्रवाशांना अनावश्यक त्रास सहन करावा लागतो. हे प्रकार सुरू राहिले तर पर्यटक पुन्हा गोव्यात येणार नाहीत. अशा टॅक्‍सीचालकांवर कठोर कारवाई करण्‍यात येईल.

- माविन गुदिन्‍हो, वाहतूकमंत्री