पणजी : सरकार आमच्या मागण्या मान्य करण्यास असमर्थ ठरत असेल तर आम्ही दिवाळीही (Diwali) आझाद मैदानावरच साजरी करू. पण आंदोलनापासून (Teachers Agitation) मागे हटणार नाही, असा निर्वाणीचा इशारा रविवारी कंत्राटी शारीरिक शिक्षकांनी (Goa Teachers) दिला. आंदोलनाचा कालचा पाचवा दिवस होता. दरम्यान, आणखी तीन शिक्षकांची प्रकृती खालावली. त्‍यामुळे त्‍यांना इस्‍पितळात दाखल करण्‍यात आले आहे.

गेल्या पाच दिवसांपासून शिक्षकांचे धरणे आंदोलन सुरू आहे. काल शनिवारी मुख्यमंत्र्यांनी मागील आश्‍वासनाचीच ढोलकी वाजविल्याने शिक्षकांमध्‍ये नाराजी आहे. नोकरीत कायम करा या मागणीसाठी आम्ही आंदोलन करीत आहोत. असे असताना सरकार आमची क्रूर चेष्टा करीत असल्याचा आरोप यावेळी शिक्षक गंगाराम लांबोर यांनी केला. ते म्हणाले, सरकार जर आमच्या आंदोलनाची दखल घेणार नसेल तर आम्ही देखील येथून हलणार नाही.

दिवाळीही आझाद मैदानावरच साजरी करू. सरकारने प्रसंगी कायद्यात बदल करावा. आम्ही बारा वर्षांपासून कार्यरत आहोत. दहा वर्षांपासून राज्यात भाजपचे सरकार आहे.

सरकारमधील एकही प्रतिनिधी आतापर्यंत आम्‍हाला भेटायला आलेला नाही. आम्हीही मतदार आहोत. या लोकप्रतिनिधींना आमचीही गरज आहे. ते आमच्या दरवाजापर्यंत येतील तेव्हा त्यांना त्यांच्या भाषेत सुनावावे लागेल. सध्या तरी मागण्या मान्य झाल्याशिवाय माघार नाही, अशी तिखट प्रतिक्रीया शिक्षकांनी व्‍यक्त केली.

महिलांची अवस्‍था बिकट

आंदोलनादरम्यान आज रविवारी पुन्हा तिघांची प्रकृती खालावल्याने त्यांना खासगी रूग्णालयात दाखल करण्यात आले. महिला आंदोलकांची खूपच बिकट अवस्‍था असल्‍याची माहिती आंदोलक दीपक गावकर यांनी दिली. रात्री ९ नंतर स्वच्छतागृह बंद असते. रात्री मद्यपी गटागटाने मैदानात येऊन दारू पिऊन गोंधळ घालतात. त्यामुळे आंदोलकांच्या जीवाला धोका निर्माण झाल्याचे त्‍यांचे म्हणणे आहे.