रेतीच्या वारेमाप उत्खननावर आळा घालण्यात गोवा सरकार 'अपयशी'..

पणजी : डिचोली (Bicholim Goa) तालुक्यातील रूमडवाडा-पाळी येथे मांडवी नदीच्‍या पात्रातून मोठ्या प्रमाणात रेतीचा उपसा (Sand extraction) होत असल्याने त्याचे गंभीर दुष्परिणाम परिसरातील पर्यावरणावर जाणवू लागले आहेत.

मुंबई उच्च न्यायालयाच्या गोवा खंडपीठाने यापूर्वी राज्‍यातील नदीपात्रात बेकायदा केल्या जाणाऱ्या रेतीच्या वारेमाप उत्खननावर निर्बंध प्रस्थापित करण्यात अपयशी ठरलेल्या सरकारी यंत्रणेवर ताशेरे ओढलेले असतानाच, रूमडवाडा येथे रविवारी पहाटेपासून रेतीचा उपसा आणि वाहतूक सुरू आहे. गोवा सरकारतर्फे अधिसूचित करण्यात आलेल्या राज्यस्तरीय समितीमार्फत यापूर्वी कोलवाळ नदी पात्रात राष्ट्रीय समुद्र विज्ञान संस्थेतर्फे सादर करण्यात आलेल्या अहवालाच्या अनुषंगाने चार ठिकाणी रेतीचा उपसा करण्यास अनुमती दिलेली आहे. परंतु अन्य ठिकाणच्या नदीत रेतीउत्खननाबाबत निर्णय घेतलेला नसताना बेकायदा मार्गाने हा व्यवसाय चालू असलेला पाहायला मिळत आहे.

विशेष म्‍हणजे रूमडवाडा-पाळी येथे यापूर्वी बेकायदा केल्या जाणाऱ्या रेती उत्खननाबाबत डिचोली मामलेदार, पोलिस तसेच संबंधित अधिकाऱ्यांकडे रितसर तक्रारी केलेल्या असताना रेती उत्खनन आणि वाहतूक या परिसरात सध्या मोठ्या प्रमाणात सुरू आहे. यामुळे नदीच्या दुतर्फा किनारपट्टीची माती वाहून जाऊन पर्यावरणीय परिसंस्थेची हानी झालेली आहे. येथे एकेकाळी खुब्यांची पैदास व्हायची. पण आता तेथे लोक बुडून मरत आहेत.