पणजी: राज्याचा अर्थसंकल्प दहा वर्षांनंतर प्रथमच एका अधिवेशनात मांडून तो मंजूर करण्याची योजना आहे. मुख्यमंत्री डॉ. प्रमोद सावंत हे अर्थमंत्री या नात्याने ६ मार्च रोजी २०२६-२७ या आर्थिक वर्षाचा अर्थसंकल्प सादर करणार आहेत.

याआधी, २०१३-१४ आर्थिक वर्षाचा अर्थसंकल्प काही दिवसांचा खंड पडलेल्या अधिवेशनात मंजूर करण्यात आला होता. २०१४-१५ पासून सहा महिन्यांसाठी लेखानुदान मंजूर करून, पावसाळी अधिवेशनात अर्थसंकल्प मंजूर करण्याची प्रथा सुरू झाली होती,

जी गेल्या आर्थिक वर्षापर्यंत सुरू होती. स्व. मनोहर पर्रीकर मुख्यमंत्री असताना मार्च २०१३ मध्ये अर्थसंकल्प मांडला होता. काही तातडीच्या रकमेसाठी त्यांनी लेखानुदान मंजूर केले आणि नंतर तेच अधिवेशन एप्रिलमध्ये सुरू ठेवून पूर्ण अर्थसंकल्प मंजूर केला गेला होता.

यंदा, ६ मार्च रोजी अर्थसंकल्प सादर केल्यानंतर साधारण तीन दिवस त्‍यावरील चर्चेसाठी राखीव ठेवले जातील. त्यानंतर विविध खात्यांच्या मागण्या विधानसभेत मांडल्या जातील.