Women's ODI Cricket Tournament: पूर्वा भाईडकर (६८) व तनया नाईक (३७) यांनी पाचव्या विकेटसाठी केलेल्या शंभर धावांच्या अभेद्य भागीदारीमुळे गोव्याने २३ वर्षांखालील महिला एकदिवसीय क्रिकेट स्पर्धेत तिसऱ्या विजयाची नोंद केली. सोमवारी मुंबई येथील एमआयजी क्लब मैदानावर त्यांनी ओडिशाला सहा विकेट राखून हरविले.

गोव्याने ओडिशाचा डाव १६३ धावांत गुंडाळला, विजयी लक्ष्याचा पाठलाग करताना गोव्याची ४ बाद ६६ अशी घसरण झाली होती. त्यानंतर पूर्वा व तनया यांनी शानदार फलंदाजी केली.

पूर्वाने ९० चेंडूंतील खेळीत पाच चौकार मारले. तनया हिने संयमी फलंदाजीत ८७ चेंडूंचा सामना करताना एक चौकार मारला. या दोघींच्या दमदार फलंदाजीमुळे ओडिशाला स्पर्धेतील तिसरा पराभव पत्करावा लागला. गोव्याचे आता सहा सामन्यांतून १२ गुण झाले आहेत.

संक्षिप्त धावफलक

ओडिशा: ४४.३ षटकांत सर्वबाद १६३ (रोशनी बागार्ती ३२, जी. एम. अलकनंदा ३१, तरन्ना प्रधान २८, पूर्वा भाईडकर १०-२-२०-२, मेताली गवंडर १०-१-१९-१, तनया नाईक १०-१-३२-१, सेजल सातार्डेकर ६.३-०-३१-३, सावली कोळंबकर ४-०-२४-०, पूर्वजा वेर्लेकर ४-०-२८-०) पराभूत वि. गोवा: ४१.५ षटकांत ४ बाद १६६ (पूर्वजा वेर्लेकर ३५, कृपा पटेल ७, मेताली गवंडर १, पूर्वा भाईडकर नाबाद ६८, दिव्या नाईक १, तनया नाईक नाबाद ३७, सूर्यास्नता स्वेन २-२३, बिजया बेहेरा २-१८).