Goa Shigmotsav 2024 :

पणजी शिगमोत्सव समितीतर्फे २५ ते ३१ मार्चपर्यंत आझाद मैदानावर सुगम संगीत, नाटक, हिंदी वाद्यवृंद, लावणी अशा कार्यक्रमांसाह यंदाचा शिगमोत्सव साजरा होणार आहे.

पणजीत स्मार्ट सिटीचे काम सुरू असल्याने यावर्षी प्रथमच १८ जून मार्गऐवजी बांदोडकर मार्गावरून चित्ररथ, रोमटामेळ,लोकनृत्य मिरवणूक निघणार आहे.

३० रोजी जुन्या सचिवालयाकडून संध्या. ५ वा. या मिरवणुकीला प्रारंभ होईल व रात्री १० पूर्वी ईएसजीकडे ती विसर्जित होईल. शिगमोत्सव समितीचे अध्यक्ष श्रीनिवास धेंपे यांनी कार्यक्रम जाहीर केला. मंगलदास नाईक व सचिव शांताराम नाईक उपस्थित होते.

विविधरंगी कार्यक्रम

२५ रोजी संध्याकाळी ७ वा. नवोदित युवा कलाकारांचा स्वर साज कार्यक्रम,२६ रोजी संध्या. ७ वा. ‘रंगी रंगला महाराष्ट्र’ हा ६५ कलाकारांचा भव्य कार्यक्रम होणार आहे व त्यात शिवराज्याभिषेक हे खास असेल. २७ रोजी संध्याकाळी ७ वा. कला चेतना वळवई व राजदीप नाईक प्रस्तुत '' काणी नव्या युगाची'' हा नाट्यप्रयोग रंगणार आहे.

२८ रोजी संध्याकाळी ७ वा. ओंकार मेलोडीज ऑर्केस्ट्रा सादर होईल. २९ रोजी संध्या. ७ वा. ‘चांदणे स्वरांचे’ कार्यक्रम होणार आहे. ३१ रोजी ७ वा. 'तुमच्यासाठी कायपण' लावणी कार्यक्रम होईल.

सोमवारी गुलालोत्सव

सोमवार २५ रोजी आझाद मैदानावर सकाळी ९.३० ते दुपारी १२.३० पर्यंत विविध जाती, धर्म,पंथ असलेल्या सर्वांना एकत्र आणणारा गुलालोत्सव,वाद्यवृंदाच्या तालावर खेळला जाणार आहे.सकाळी ९ वाजता श्री महालक्ष्मीला नमन करून मंदिराकडून रोमटामेळ वाजत गाजत आझाद मैदानाकडे निघेल.

बक्षिसांच्या रकमेत वाढ

यंदा चित्ररथ, रोमटामेळ स्पर्धकांसाठी बक्षिसांच्या रकमेत वाढ करण्यात आली आहे. पर्यटन खात्याच्या सौजन्याने यंदा साडे दहा लाख रुपयांची बक्षिसे देण्यात येतील. चित्ररथासाठी अनुक्रमे रु.७५ हजार,रु. ६० हजार, रु.५० हजार, रु.४५ व रु.४० हजार अशी बक्षिसे असतील. शिवाय धेंपे उद्योग समूहातर्फे प्रथम तीन क्रमांकाना तसेंच रोमटामेळ विजेत्यांना अनुक्रमे १५,१० व १० हजारांची बक्षिसे देण्यात येतील. रोमटामेळ स्पर्धेसाठी अनुक्रमे रु.७५ हजार, रु.५० हजार, रु.४० हजार, रु.३० हजार व रु.२० हजार अशी बक्षिसे आहेत. शिवाय उत्तेजनार्थ बक्षिसे, लोकनृत्य, वेशभूषा स्पर्धेसाठी वेगळी बक्षिसे आहेत.

आचारसंहितेमुळे मिरवणूक वेळेतच!

लोकसभा निवडणुकीच्या पार्श्वभूमीवर आचारसंहिता लागल्याने ३० मार्च रोजी चित्ररथ मिरवणूक वेळेत सुरू होऊन ती वेळेत संपविण्याचे बंधन असून स्पर्धकांनी याची नोंद घ्यावी, असे आवाहन मंगलदास नाईक यांनी केले व संध्याकाळी ६ नंतर प्रवेशिका स्वीकारल्या जाणार नाहीत,असे कळवले आहे.