Goa Beach: बायणा किनारी बेकायदा जलक्रीडा नको

Goa Beach:

बायणा - वास्को येथील समुद्रकिनाऱ्यांवर काही बेकायदा जलक्रीडा व्यावसायिकांनी कब्जा केला आहे. त्यामुळे स्थानिक जलक्रीडा व्यावसायिकांवर अन्याय होत आहे. त्यामुळे त्यांना बायणा येथे व्यवसाय करण्यास बंदी घाला, अशी मागणी राष्ट्रवादी काँग्रेसचे अध्यक्ष जुझे फिलीप डिसोझा यांच्या नेतृत्वाखालील शिष्टमंडळाने मुख्यमंत्र्यांना भेटून केली.

मुख्यमंत्री डॉ. प्रमोद सावंत यांनी या शिष्टमंडळाला किनारपट्टी पोलिस अधीक्षकांबरोबर चर्चा करून या बेकायदेशीर जलक्रीडा व्यावसायिकांवर बंदी घालण्यात येईल, असे आश्‍वासन दिले.

कळंगुट, बागा व नेरूल येथील जलक्रीडा एजंट हे बायणा व बोगमाळो येथे त्यांना परवानगी नसताना जलक्रीडा प्रकार व्यवसाय करून बायणा क्रीडा व्यावसायिकांवर अन्याय करत आहेत. या ठिकाणी काही दलाल त्यांना यासाठी मदत करत आहेत. त्यामुळे बायणा येथील जलक्रीडा संघटनेच्या व्यावसायिकांना हा व्यवसाय बंद करण्याची पाळी आली आहे.

या संघटनेचे 40 सदस्य आहेत व गेली अनेक वर्षापासून हा व्यवसाय या बायणा समुद्रकिनाऱ्यावर सुरू आहे. मुख्यमंत्र्यांनी शिष्टमंडळाने उपस्थित केलेल्या समस्या ऐकून घेतल्या व किनारपट्टी पोलिस अधीक्षकांशी चर्चा करून बेकायदा जलक्रीडा व्यवसाय करणाऱ्या एजंटांना तेथे बंदी घालण्याचे निर्देश दिले जातील,

असे आश्‍वासन दिल्याची माहिती जुझे फिलीप डिसोझा यांनी दिली. पर्यटन खात्याने प्रत्येक समुद्रकिनाऱ्यावर तेथील स्थानिकांना जलक्रीडा व्यवसाय करण्यास प्राधान्य दिले आहे.

बायणा येथेही तेथील स्थानिक हा व्यवसाय करून उदरनिर्वाह गेली अनेक वर्षे करत आले आहेत. मुख्यमंत्र्यांना यामध्ये लक्ष घालून बायणा जलक्रीडा व्यावसायिकांना न्याय द्यावी, अशी विनंती करण्यात आल्याचे डिसोझा यांनी सांगितले.

बिगर गोमंतकीय एजंट

माजी मुख्यमंत्री मनोहर पर्रीकर यांनी बायणा समुद्रकिनाऱ्यावर जलक्रीडा प्रकार व्यवसायाला परवानगी दिली होती. या व्यवसायावर या सदस्यांची कुटुंबे अवलंबून आहेत. या व्यवसायासाठी लागणारे कर्मचारी त्यावर अवलंबून आहेत. या ठिकाणी पॅरासेलिंग, जॅटस्की, बोटीने फेरफटका तसेच स्कुबा डायव्हिंग यासारखे जलक्रीडा पर्यटकांना उपलब्ध करण्यात आले असताना काही इतर समुद्रकिनाऱ्यावरील बिगर गोमंतकीय एजंट बायणा येथे अतिक्रमण करत आहेत.