Mapusa : ‘सीबीएसई''च्या इयत्ता 7 वीच्या पाठ्यपुस्तकातील चुकीचा इतिहास व मोगलांचे उदात्तीकरण करणारे धडे त्वरित वगळावेत, अशी मागणी म्हापसा येथे हिंदू राष्ट्र-जागृती आंदोलनाच्या माध्यमातून विविध हिंदुत्वनिष्ठ संघटनांनी केल्या.

देशव्यापी हिंदू राष्ट्र-जागृती आंदोलनाचा हा एक भाग आहे. आंदोलनाला सर्वश्री नितीन फळदेसाई, गोवा प्रमुख, राष्ट्रीय बगरंज दल; जयेश थळी, सचिव, गोमंतक मंदिर महासंघ; अधिवक्त्या रोशन सामंत, प्रमुख, विद्याभारती गोवा; राजश्री गडेकर, रणरागिणी आदींनी संबोधित केले.

या आंदोलनात ‘भारत माता की जय’, ‘विद्याभारती’, ‘राष्ट्रीय हिंदू वाहिनी’, ‘गोमंतक मंदिर महासंघ, रणरागिणी, हिंदु जनजागृती समिती, सनातन संस्था आदी संघटनांनी सहभाग घेतला. विकृत आणि दिशाभूल करणारा इतिहास भावी पिढीला शिकवणे म्हणजे शिक्षणाचे विकृतीकरण आहे.

मोगलांचे उदात्तीकरण करणारे धडे असणारे पाठ्यपुस्तक अभ्यासक्रमातून त्वरित मागे घ्यावे, या विकृत आणि खोटा इतिहास लेखन करणार्‍यांवर कठोर कारवाई करावी आणि भारतीय पराक्रमी योद्ध्यांचा शौर्यशाली इतिहासाचा समावेश इतिहासाच्या पाठ्यपुस्तकात करावा, अशी मागणी यावेळी करण्यात आली. हिंदु जनजागृती समितीचे दक्षिण गोवा समन्वयक सत्यविजय नाईक यांनी ठराव मांडले. सूत्रसंचालन युवराज गावकर यांनी केले.