Goa Rainfall on 28th of June 2023: गोव्यात पावसाला यंदा वेळाने सुरवात झाली. त्यामुळे 1 जून ते 26 जून या कालावधीत गोव्यात एकंदरित 40 टक्के कमी पाऊस झाला होता. पण, बुधवारी 28 जून रोजी एकाच दिवसात गोव्यात 349 टक्के अधिक पाऊस झाला आहे.

या दिवशी गोव्यात सरासरी 29.8 मिलीमीटर पाऊस होत असतो पण 28 जून रोजी गोव्यात 133.9 मिलिमीटर पाऊस झाला आहे. भारतीय हवामान विभागाने ही माहिती दिली आहे.

(IMD, IMD Goa)

जिल्हानिहाय विचार करायचा झाल्यास उत्तर गोव्यात 28 जून रोजी 133.9 मिलीमीटर पाऊस झाला आहे. या दिवशी उत्तर गोव्यात सरासरी 32.5 मिलीमीटर पाऊस होतो. म्हणजेच जिल्ह्यात एका दिवसात 312 टक्के अधिक पाऊस झाला आहे.

दक्षिण गोवा जिल्ह्याचा विचार करता येथे 134 मिलीमीटर पाऊस दिवसात झाला असून एरवी हे प्रमाण सरासरी 27.5 मिलीमीटर असते. म्हणजेच दक्षिण गोवा जिल्ह्यात आज, बुधवारी 387 टक्के अधिक पाऊस झाला आहे.

दरम्यान, या महिन्यातील 1 जून ते 26 जून या कालावधीतील पावसाच्या आकडेवारीकडे पाहिल्यास या काळात गोवा राज्यात 502.6 मिलीमीटर पाऊस झाल्याचे दिसून येते. तर एरवी या कालात राज्यात 833.1 मिलीमीटर पाऊस होत असतो. त्यामुळे एकंदरित राज्यात 40 टक्के कमी पाऊस झाला आहे.

जिल्हानिहाय विचार करता उत्तर गोव्यात 1 जून ते 26 जून या कालावधीत 458.1 मिलीमीटर पाऊस झाला आहे. एरवी हे प्रमाण 846 मिलीमीटर असते. म्हणजेच या जिल्ह्यात या काळात 46 टक्के कमी पाऊस झाला आहे.

तर दक्षिण गोव्यात या काळात 821.7 मिलीमीटर पाऊस होत असतो. पण यंदा तो 541.9 मिलीमीटर झाला आहे. म्हणजेच दक्षिण गोव्यातील पावसात या काळात 34 टक्के घट दिसून आली आहे.