पणजी : अरबी समुद्रात स्थिरावलेला कमी दाबाचा पट्टा आणि ‘मोंथा’ च्या प्रभावामुळे राज्याला ऐन ऑक्टोबरात पावसाने झोडपून काढले. मुसळधार पावसामुळे विविध ठिकाणी रस्ते तुंबले, घरांची पडझड झाली तर भातपीकासह इतर हंगामी पिकांचे मोठे नुकसान झाले आहे. विजेचा पुरवठा खंडित होणे, वाहतुकीत अडथळे आणि जलमय परिसर या साऱ्यामुळे नागरिक हैराण झाले आहेत. ऑक्टबरमधील आतापर्यंत ११.८२ इंच पावसाची नोंद झाली आहे.

दोन दिवसांपासून पावसाची तीव्रता काही प्रमाणात मंदावली होती परंतु आज पहाटेपासूनच राज्यातील सर्वच भागात पावसाने हजेरी लावली. पुढील दोन दिवस मध्यम स्वरूपाचा पाऊस कायम राहणार असल्याचे गोवा वेधशाळेचे संचालक नहुष कुलकर्णी यांनी सांगितले. गुरूवारीही ‘यलो अलर्ट’ कायम आहे.

आज सकाळपासून ले भात देखील झडून गेले. हाता-तोंडाशी आलेला घास या अस्मानी संकटाने हेरावरून घेतला शेतकऱ्यांवर मोठे संकट कोसळले आहे. पणजी येथे सकाळी ८.३० ते सायंकाळी ५.३० वा. पर्यंत ५६.४ मिमी म्हणजेच २.१४ इंच तर मोपा विमानतळ परिसरात २४.५ मिमी पावसाची नोंद करण्यात आली.

शाळेला सुट्टी असल्याने वाचला जीव

बोडणवाडा सालेली सत्तरी येथील राजाराम गावकर या घराचे छप्पर मध्यरात्री मोठ्या प्रमाणात पडत असलेल्या पावसामुळे कोसळले. गावकर कुटुंबिय ज्या खोलील रात्री झोपायचे त्याच खोलीचे छप्पर कोसळले.

सुदैवाने, शाळांना दिवाळीची सुट्टी असल्याने राजाराम गावकर यांनी आपल्या पत्नीसह मुलांना मामाच्या गावी पाठविले होते आणि राजाराम कामाला गेला होता त्यामुळे अनर्थ टळला. गावकर कुटुंबियाचे दैव बलवत्तर म्हणून अपघात टळल्याचे बोलले जाते.

दिवसभरातील प्रमुख घटना

१) केसरकरवाडा, मोर्ले सत्तरी येथे पावसाचे पाणी मीटरमध्ये गेल्याने शॉटसर्कीट होऊन शशिकांत केसरकर यांच्या घराचे नुकसान झाले.

२) डिचोलीत पावसाचा आठवडी बाजाराला फटका. लोकांचे हाल

३) पणजीत पावसामुळे रस्ते पाण्याखाली. अटल सेतूवर साचले पाणी, अपघातामुळे वाहतूकीस अडथळा.

४) सांताक्रुझ येथील केंकरे इस्टेटची संरक्षण भिंत कोसळली आणि शेजारील घराचे देखील नुकसान.

१०४ कॉल्स; २१ लाखांहून अधिक नुकसान

राज्यात मोठ्या प्रमाणात सुरू असलेल्या पावसामुळे आपत्कालीन संकटांसाठी झाड कोसळणे व इतर समस्यांसाठी १५ दिवसांत गोवा अग्निशमन दलाला १०४ हून अधिक कॉल्स आले आहेत. पाऊस व इतर आपत्कालीन प्रकारामुळे सुमारे २१ लाखाहून अधिक संपत्तीचे नुकसान झाले आहे तर ६४ लाखाहून अधिक संपत्ती आणि संसाधने वाचविण्यात दलाला यश आले आहे.