पणजी: राज्यात यंदाच्या वर्षी पाऊस लवकरच धडक देण्याची शक्यता आहे. हवामान खात्याने दिलेल्या माहितीनुसार येत्या तीन दिवसांसाठी यलो अलर्ट जारी करण्यात आलाय. यापूर्वी देखील हवामान खात्याने गोव्यात पाऊस पडण्याची शक्यता वर्तवली होती. राज्यात सध्या ऊन-पावसाचा खेळ सुरू आहे.

गोवा हे किनारी राज्य असल्याने इथे नेहमीच पावसाचा तडाखा अधिक असतो. १३ मे ते १६ मे २०२५ पर्यंत गोव्यात काही ठिकाणी ३०-४० किमी प्रतितास वेगाने वाहणाऱ्या वाऱ्यांसह वादळ येण्याची शक्यता आहे आणि म्हणूनच हवामान खात्याकडून गोव्यासाठी यलो अलर्ट जारी करण्यात आला आहे.

मच्छीमारांनी समुद्रात न जाण्याची विनंती

उत्तर गोव्यातील पणजीत सोमवारी  कमाल ३५.५ अंश, तर किमान २७.६ अंश सेल्सिअस तापमानाची नोंद झाली होती, तर दुसऱ्या बाजूला मुरगावमधील कमाल तापमान ३५ अंश आणि किमान तापमान २६.८ अंश सेल्सिअस होते.

गेल्या काही दिवसांपासून गोव्यात विविध ठिकाणी पाऊस सुरू झालाय आणि आता हा पाऊस आणखीन वाढण्याची शक्यता वर्तवली जातेय. राज्यात आत्तापर्यंत सरासरी १३.९ मिलिमीटर पावसाची नोंद झालीये. या दरम्यान वाऱ्याचा वेग देखील अधिक असण्याची शक्यता असल्याने मच्छीमारांनी समुद्रात न जाण्याची विनंती केली जातेय.

मान्सून गोव्यात येणार

यंदाच्या वर्षी 13 मे पर्यंत मान्सून अंदमान आणि निकोबर येथे धडक देईल अशी माहिती समोर आली होती. दक्षिण अरबी समुद्रासह अंदमानमध्ये यायला हवामान अनुकूल असल्याचं हवामान खात्याचं म्हणणं आहे.