Goa News: केंद्र सरकारने बंदी घातलेल्या पॉप्युलर फ्रंट ऑफ इंडियाला (पीएफआय) आर्थिक मदत करत असल्याप्रकरणी संशय असलेल्या फातोर्ड्यातील अल्ताफ सय्यद हा तपासकामात सहकार्य करत नसल्याप्रकरणी तसेच अडथळे आणत असल्याबद्दल बेळगावचे आयकर खात्याचे उपसंचालक अमित शिंदे यांनी सायबर गुन्हे कक्षाकडे तक्रार दाखल केली आहे.

दरम्यान, या खात्याच्या अधिकाऱ्यानी काही दिवसांपूर्वी दक्षिण गोव्यात छापे टाकले होते.सायबर गुन्हे कक्षाकडे दाखल केलेल्या तक्रारीत संशयित सय्यद हा चौकशीसाठी त्याचा मोबाईल देण्यास तयार नाही. त्याने त्यामध्ये असलेले पुरावेही नष्ट केले आहेत. त्याच्या कारवाया या संशयास्पद आहेत.

सरकारी कामात अडथळा आणत आहे. तो पीएफआयचा सदस्य असल्याने या संघटनेला तो गुप्तपणे आर्थिक मदत करत आहे. गेल्या 19 ऑक्टोबरला त्याच्या फातोर्डा येथील घरावर आयकर खात्याच्या अधिकाऱ्यांनी छापा टाकला, तेव्हा त्याने अधिकाऱ्यांना त्यांचे काम करण्यास अडथळा आणला.

व्यवसायासाठी वापरत असलेला मोबाईलही त्याने देण्यास नकार दिला. तसेच मोबाईलचा पासवर्डही दिला नाही, असे तक्रारीत नमूद करण्यात आले आहे. संशयित अल्ताफ सय्यद याच्या कारवाया संशयास्पद असून तो कटकारस्थान रचून देशद्रोहाचा ठपका असलेल्या पीएफआयला आर्थिक मदत करत आहे.

तसेच, देशाच्या काळ्या पैशाच्या मनी लॉँडरिंगमध्येही गुंतला आहे. त्यामुळे देशाच्या सुरक्षिततेला त्याच्या या कारवाया धोकादायक आहेत. त्याने त्याच्याकडील सर्व पुरावे नष्ट केले आहेत, असे तक्रारीत म्हटले आहे. या प्रकरणाची चौकशी सायबर गुन्हे कक्षाचे अधिकारी करत आहे.