पणजी: धन्यवाद! माझ्या स्वप्नांना बळ दिलं, मला हे जगं दिलंत, हे एका लेकीने बापासाठी काढलेले शब्द आहेत. प्रवासी म्हणून वडील बसलेल्या विमानात फर्स्ट ऑफिसर म्हणून सूत्र लेकीच्या हाती होती. वडिलांसोबत चेन्नईवरुन गोव्याकडे उड्डाण घेताना लेकीने फ्लाईटमध्ये उद्घोषणा केली. माझे वडील याच विमानातून प्रवास करतायेत, असे तिने अभिमानाने सांगितलं. गोव्यातल्या बाप लेकीचा हा व्हिडिओ सोशल मिडियावर तुफान व्हायरल होत आहे.

महाराष्ट्रवादी गोमंतक पक्षाचे नेते दीपक ढवळीकर आणि लेक गौरी यांचा एक भावनिक आणि तितकाच कौतुकास्पद व्हिडिओ सध्या सोशल मिडियावर चांगलाच व्हायरल होत आहे. दीपक ढवळीकर चेन्नईतून गोव्याकडे प्रवास करत होते. इंडिगोच्या ज्या विमानातून ढवळीकर प्रवास करत होते त्या विमानाचे फर्स्ट ऑफिसर त्यांची लेक होती. गौरी ढवळीकरांनी विमानात आल्यावर उद्घोषणा करताना विमानात तिचे वडील देखील बसल्याचे माहिती देत, भावना व्यक्त केल्या.

गौरी ढवळीकरांनी विमानात प्रवाशांचे स्वागत करत, या विमानातून माझे वडील (दीपळ ढवळीकर) प्रवास करत असल्याचे सांगितले. तसेच, मला हे जगं देण्यासाठी धन्यवाद, माझी स्वप्न जगण्यास बळ देण्यासाठी धन्यवाद, अशा शब्दात गौरी वडील दीपक यांचे धन्यवाद मानले. यानंतर विमानातील सहप्रवाशांनी टाळ्यांचा कडकाडट केला. बापलेकीच्या या भावनिक आणि अभिमानास्पद प्रसंगाचा व्हिडिओ सोशल मिडियावर चांगलाच व्हायरल होत आहे.

मडगावचा आवाजचे युवा नेते प्रभव नाईक यांनी एक्सवर हा व्हिडिओ शेअर करुन गौरी ढवळीकरचे अभिनंदन करत कौतुक केले आहे. "तिच्या संदेशातून तिने वडिलांच्या प्रेमप्रती कृतज्ञता व्यक्त केली आहे. तसेच तिचा प्रवास गोव्यातील तरुणांना प्रेरणा देतील, आणि स्वप्नांचा पाठलाग करण्याचे बळ देतील," असे नाईक यांनी म्हटले आहे.

दीपक ढवळीकर हे महाराष्ट्रवादी गोमंतक पक्षाचे अध्यक्ष आहेत. त्यांचा भाऊ सुदीन ढवळीकर हे राज्यात सत्तेत असून, त्यांच्याकडे वीज खात्याच्या मंत्रिपदाची जबाबदारी आहे.