Hotels in Goa: पर्यटन खात्याकडे नोंदणी न केलेल्या गोव्यातील सुमारे 800 हॉटेल्स व इतर पर्यटक निवासांना नोटिसा बजावण्यात आल्या आहेत. दर आठवड्याला जवळपास 30 हॉटेल्सना नोंदणी न केल्याबद्दल का कारवाई करण्यात येऊ नये, नोटीस देऊन यासंदर्भात पंधरवड्यात स्पष्टीकरण मागण्यात आले आहे.

हल्लीच 31 हॉटेल्स व रेस्टॉरंटविरुद्ध कारवाई करून प्रत्येकी 1 लाखाचा दंड ठोठावण्यात आला होता, अशी माहिती पर्यटन संचालक निखिल देसाई यांनी दिली.

पर्यटन कायद्यानुसार राज्यातील पर्यटकांना निवास देणाऱ्या हॉटेल्स तसेच इतर होम स्टे व निवास खात्याकडे नोंदणी करणे अनिवार्य आहे. या नोंदणीसाठी यापूर्वी पुरेशी मुदत देण्यात आली होती, मात्र तरी अनेकांनी ही नोंदणी केलेली नाही.

त्यामुळे खात्याने अशा हॉटेल्स व रेस्टॉरंट्सची माहिती घेण्यास सुरू केले आहे. अनेकानी नोंदणी न करता पर्यटन व्यवसाय केल्याबद्दल पर्यटन खात्याने त्याची गंभीर दखल घेतली आहे.

त्यांनी खात्याचा महसूल बुडविला आहे. त्यामुळे उल्लंघन करणाऱ्यांविरुद्ध कडक दंडात्मक कारवाई करण्याचे ठरविले आहे, अशी माहिती अधिकाऱ्यांनी दिली.