मडगाव: गोव्यात लाखो रुपयांची बक्षिसे असणारी हाऊजी चालू देणार नाही, अशी घोषणा पोलिस महासंचालकांनी केला असला तरी केपे येथील सरकारी जागा असलेल्या स्पोर्ट कॉम्प्लेक्समध्ये चक्क आठ लाख इनाम असलेली हाऊजी बिनदिक्कतपणे संपन्न झाली.

या संदर्भात तक्रार करण्यासाठी दक्षिण गोव्याचे पोलिस अधीक्षक टीकम सिंग वर्मा यांच्याशी संपर्क करण्यासाठी वारंवार फोन केला तरी त्यांनी फोन उचलला नाही. केपेचे उपाधीक्षक सागर एकोस्कर यांच्या बाबतीतही तोच अनुभव आला.

केपेचे मामलतदार नाथन आफोन्‍सो यांच्याशी संपर्क साधला असता तुम्ही केपे पोलिसांकडे संपर्क साधा, असे त्यांनी सांगितले. केपे येथे या हाऊजीचे आयोजन केले जाणार अशी जाहिरात उघडपणे केली जात असतानाही प्रशासनाने त्याकडे दुर्लक्षच केले होते.

या आयोजनामुळे केपे क्रीडा संकुलाकडे एव्हढे लोक जमले होते की या परिसराला अक्षरशः जत्रेचे स्वरूप आले होते. याठिकाणी वाहतूक पोलिस होते; पण त्यांनी फक्त बघ्याची भूमिका घेतली होती.

या हाऊजी कार्यक्रमांमुळे स्थानिकाना त्रास झाला; पण पोलिसांकडे तक्रार करूनही त्याचा काही फायदा झाला नाही. दक्षिण गोव्याच्या जिल्हाधिकारी एग्ना क्लीटस यांच्याशी संपर्क साधला असता आम्ही या प्रकरणी दखल घेऊ, असे त्यांनी सांगितले. दरम्यान, या शोच्यावेळी ५ एप्रिल रोजी केपे नगरपालिका चौकात असा आणखी एक हाऊजी शो होणार असे जाहीर करण्यात आले. एका हाऊझी स्लिपसाठी एक हजार रुपये आकारले जात होते.