पणजी: कृत्रिम बुद्धीमत्ता आणि मोबाईल अप्लिकेशन तयार करण्यात पारंगत असलेल्यांसाठी गोवा पोलिसांनी एका मोठ्या स्पर्धेची घोषणा केली आहे. गोवा पोलिसांनी हॅकेथॉन २०२५ च्या तिसऱ्या सीझनची घोषणा केली असून, या विषयातील तज्ञांनी सहभाग घेण्याचे आवाहन केले आहे. यासाठी पोलिसांनी एकूण नऊ विषय जाहीर केले असून, प्रत्येक विषयासाठी ५०,००० रुपये रोख रक्कम बक्षीस म्हणून दिली जाणार आहे.

पोलिसांनी या स्पर्धेसाठी सुरक्षेसंबधित तंत्रज्ञान विकसित करण्यासंबधित विषयांना प्राधान्य दिले आहे. यामध्ये रात्र गस्त, सायबर पेट्रोलिंग, सीसीटीव्ही, लैंगिक हिंसाचार यासारख्या विषयांवर तंत्रज्ञानाच्या मदतीने उपाय सुचविण्याचे व मोबाईल तयार करण्याचे आव्हान ठेवले आहे. प्रत्येक समस्येवरील उत्तम उपायासाठी पोलिसांकडून ५० हजार रुपयांचे बक्षीस दिले जाणार आहे.

इच्छुकांना ११ सप्टेंबरपर्यंत या स्पर्धेत सहभाग नोंदवता येणार आहे. नोंदणी करण्यासाठी येथे क्लिक करा.

गोवा पोलिस हॅकेथॉन २०२५ चे विषय

१) नाईट व्हिजिल – स्मार्ट पेट्रोलिंग व्हेरिफिकेशन अप (रात्र गस्तीसाठी)

२) एआय आधारीत डीप फेक व्हिडिओ तपासणीसाठी टूल

३) एआय आधारीत आवाज तपासणी आणि कृत्रिम आवाज तपासणी

४) सायबर पेट्रोलिंग (ऑनलाईन फसवणूक निगडीत गोष्टी पडताळणीसाठी)

५) पोलिस स्थानकाला भेट देणाऱ्यांसाठी मदत करणारे एआय आधारीत टूल

६) ई- बंदोबस्त – बंदोबस्तावर असणाऱ्या पोलिसांचा ट्रॅक ठेवण्यासाठी

७) एआय आधारीत सीसीटीव्ही आणि डिजिटल मिडिया फॉरेन्सिक चाचणी

८) एआय आधारीत पोलिस हेल्पलाईन ११२ ला मदत करणारे टूल

९) लैंगिक अत्याचार व हिंसाचार तपासात मदत करणारे एआय आधारीत गाईड