"हांव खरें तेंच उलायला", एका शब्दाने उडाला गोंधळ; तरीही मंत्री कामत शब्दावर 'ठाम'

पणजी: "१५ साल भाजप गोवा में आ नही सकती" (भाजप १५ वर्षे गोव्यात येऊ शकत नाही) असं म्हणणारा व्हिडिओ व्हायरल झाल्याने गेल्या काही दिवसांपासून चर्चेत असलेले नवनिर्वाचित मंत्री आणि मडगावचे आमदार दिगंबर कामत यांनी अखेर या प्रकरणावर मौन सोडले आहे.

भाजप प्रदेशाध्यक्ष दामू नाईक यांच्या वाढदिवसाच्या कार्यक्रमात मुख्यमंत्री प्रमोद सावंत यांच्यासह अन्य भाजप पदाधिकाऱ्यांसमोर केलेल्या या विधानामुळे सोशल मीडियावर मोठी खळबळ उडाली होती. मात्र, आता स्वतः कामत यांनी माध्यमांसमोर येऊन यावर स्पष्टीकरण दिले आहे.

प्रसारमाध्यमांशी बोलताना कामत म्हणाले की, "मी जे खरं तेच बोललो आहे. माझ्या म्हणण्याचा माध्यमांनी चुकीचा अर्थ काढला." त्यांनी स्पष्ट केले की, ते म्हणाले होते की "१५ साल भाजप गोवा में हार नही सकती" (भाजप १५ वर्षे गोव्यात हरू शकत नाही). मात्र, त्यांचा हा हिंदीतील शब्द 'आ नही सकती' (येऊ शकत नाही) असा ऐकल्यामुळे गैरसमज झाला.

आपल्या वक्तव्याचा उद्देश स्पष्ट करताना कामत म्हणाले की, भाजपची पुढील १५ वर्षे सत्ता जाणार नाही, आणि दामू नाईक यांनी गोव्यात तसे वातावरण निर्माण करावे, असेच त्यांना म्हणायचे होते. मात्र, त्यांच्या या विधानाचा विपर्यास झाल्यामुळे मोठा गोंधळ निर्माण झाला. विरोधकांनीही या संधीचा फायदा घेत भाजप आणि मंत्री कामत यांच्यावर जोरदार टीका केली. कामत यांच्या या स्पष्टीकरणामुळे या प्रकरणावर पडदा पडण्याची शक्यता आहे.