पणजी: देशातील सुमारे ६० टक्के जनतेचे उद्धारक मंडल आयोगाचे अध्यक्ष बी. पी. मंडल यांची १०६वी जयंती २५ ऑगस्‍ट रोजी गोव्यात साजरी करण्यात येणार आहे. त्यानिमित्त पर्वरीत ओबीसींचा महामेळावा आयोजित करण्यात आला आहे.

देशातील ओबीसींना शिक्षण व रोजगारात राखीव जागा ठेवण्याची मंडल आयोगाची शिफारस तत्‍कालीन व्ही. पी. सिंग सरकारने स्वीकारल्याने ओबीसींनी विविध क्षेत्रात उल्लेखनीय कामगिरी बजावली आहे त्यामुळेच राष्ट्रीय ओबीसी महासंघाने उद्याचा हा कार्यक्रम आयोजित केला आहे.

मुख्यमंत्री डॉ. प्रमोद सावंत तसेच इतर मंत्री, ज्‍यांचा ओबीसीत समावेश आहे, अशा १९ समाजांचे सदस्य या मेळाव्यात सहभागी होणार आहेत. ओबीसीसाठी स्वतंत्र मंत्रालय, गोमेकॉतील पदव्युत्तर अभ्यासक्रमात राखीव जागांसाठी प्रवेश देताना रोस्टर पद्धतीचा अवलंब आदी मागण्या या मेळाव्यात करण्यात येतील.