पणजी: राष्ट्रीय महामार्ग-६६ वरील सुकूर ते सांगोल्डा या उजव्या बाजूचा (दक्षिणेकडील) मार्ग १७ रोजी मध्यरात्रीपासून ते १५ नोव्हेंबरपर्यंत संपूर्ण बंद राहिल, असे सार्वजनिक बांधकाम खात्याने जाहीर केले आहे.

यामुळे पणजी म्हापसा मार्गावरील प्रवाशांना मोठा फटका बसण्याची शक्यता आहे. हा बंदोबस्त सहा-लेन उड्डाणपुलाच्या बांधकामासाठी ‘प्रीकास्ट सेगमेंट्स’ लाँचिंगचे महत्त्वपूर्ण काम सुरळीत करण्यासाठी करण्यात आला आहे.

या काळात वाहनांची संपूर्ण वाहतूक थांबवून काम अडथळाविरहित व सुरक्षितपणे पूर्ण करण्याचा उद्देश असल्याचेही खात्याने स्पष्ट केले आहे. पर्वरी आराडी चौक (खांब क्रमांक ८, सुकूर) पासून सांगोल्डा बायपास (खांब क्रमांक १६) पर्यंतचा राष्ट्रीय महामार्ग पूर्णपणे बंद राहणार आहे.

या संपूर्ण भागात कोणत्याही प्रकारची वाहने चालविण्यास परवानगी दिली जाणार नाही. पर्यायी मार्ग म्हणून पणजीहून म्हापसाकडे जाणारी वाहतूक ओ’कोकेरो चौकात वळवून चोगम रोडमार्गे वळविली जाणार आहे.